ბათუმში, „მეტრო სითის" ადმინისტრაციულ შენობაში მიმდინარეობს მოლაპარაკება 200-ზე მეტი მუშის საკითხზე, რომლებიც, რკინიგზელთა ახალი პროფკავშირის ინფორმაციით, გაათავისუფლეს. ადგილზე არიან პროფკავშირის წარმომადგენლები და სტუდენტური მოძრაობა „აუდიტორია 115-ის" წევრები.
რამდენიმე დღის წინ ბათუმში, ერთ-ერთი მშენებარე კორპუსიდან ორი მუშა გადმოვარდა და დაიღუპა. რკინიგზელთა ახალი პროფკავშირის ინფორმაციით, ეს უსაფრთხოების პირობების არარსებობის გამო მოხდა.
ადგილზე დასაქმებულმა სხვა თანამშრომლებმა, გარდაცვლილთა ოჯახის თხოვნით და კომპანიის მენეჯმენტთან შეთანხმებით, რამდენიმე სამუშაო დღე მეგობრების გლოვაში გაატარეს და სამსახურში არ გამოცხადდნენ. კომპანიის წარმომადგენლებთან სიტყვიერი შეთანხმებით, მათ ეს დღეებიც კი აუნაზღაურდებოდათ და შესაბამისად, უფლება მიეცათ დასაქმებულებს მოქცეულიყვნენ მიცვალებულთა ოჯახის თხოვნის შესაბამისად.
პროფკავშირის ინფორმაციით, ამ ფაქტის შემდეგ, დასაქმებულებმა ჩვეულებრივ გააგრძელეს მუშაობა, დღეს კი აღმოაჩინეს, რომ მათთვის სამსახურში შესასვლელი კარი დაკეტილი იყო. როგორც მათ კომპანიის წარმომადგენლება განუცხადეს, ისინი დათხოვნილი არიან სამსახურიდან.
„ამ ფაქტის მოჰყვა, საპროტესტო აქცია სრულიად ლეგიტიმური მოთხოვნით, რომ დასაქმებულები დაუბრუნდნენ სამუშაო ადგილებს. აღნიშნულის შემდეგ, კომპანიამ გააკეთა განცხადება, სადაც ნათქვამია, რომ სამსახურიდან არავინ გათავისუფლებულა და რომ დროებითაა შეჩერებული მუშაობა.
თუ ეს ასეა, მაშინ დასაქმებულების მოთხოვნაა, აუნაზღაურდეთ მათ გაცდენილი დღეები, ვინაიდან, სამუშაოები შეჩერდა მათგან დამოუკიდებელი მიზეზებით. ამავდროულად, მიეცეთ მათ გარანტია, რომ აუცილებლად დაუბრუნდებიან ისინი სამუშაოს", - წერია პროფესიული კავშირების განცხადებაში.