19 სექტემბერს გაეროს გენერალურ ასამბლეაზე მსოფლიოს სხვადასხვა ქვეყნის ლიდერმა სიტყვით გამოსვლისას საქართველოს შესახებაც ისაუბრა. თურქეთის პრეზიდენტმა, რეჯეფ თაიფ ერდოღანმა გამოსვლისას განაცხადა, რომ აზერბაიჯანისა და საქართველოს ტერიტორიული მთლიანობა მნიშვნელოვან როლს ასრულებს სამხრეთ კავკასიის სტაბილურობაში და, რომ მსოფლიო ქვეყნებმა ბევრი უნდა იმუშაონ ამ კონფლიქტების მოგვარებისთვის.
„აზერბაიჯანისა და საქართველოს ტერიტორიული მთლიანობა სამხრეთ კავკასიაში რეგიონული სტაბილურობის გასაღებია. აქედან გამომდინარე, ჩვენ ბევრი უნდა ვიმუშაოთ, რომ მოგვარდეს კონფლიქტები მთიან ყარაბაღში, აფხაზეთსა და სამხრეთ ოსეთში“,- თქვა ერდოღანმა.
ესტონეთის პრეზიდენტმა, კერსტი კალიულაიდმა გაეროს გენერალურ ასამბლეაზე აღნიშნა, რომ გრძელდება სამხედრო აგრესია აღმოსავლეთ უკრაინაში, ოკუპირებულია საქართველოს ტერიტორიები და ყირიმის ნახევარკუნძული.
„აღმოსავლეთ უკრაინაში კვლავ მიმდინარეობს სამხედრო აგრესია და კონფლიქტი, რაც იწვევს სამოქალაქო პირების (მათ შორის, ეუთოს სპეციალური მონიტორინგის მისიის წევრის) დაღუპვას. ყირიმის ნახევარკუნძული კვლავ ოკუპირებულია, ისევე, როგორც საქართველოს ტერიტორიები. ასევე გრძელდება კონფლიქტები დნესტრისპირეთსა და მთიან ყარაბაღში“, - თქვა ესტონეთის პრეზიდენტმა.
ლატვიის პრეზიდენტმა, დალია გრიბაუსკაიტემ განაცხადა, რომ რუსეთს აქვს საერთაშორისო პასუხისმგებლობა, დაიცვას მშვიდობა.
„რუსეთს აქვს პასუხისმგებლობა, რომ დაიცვას საერთაშორისო მშვიდობა, რადგან ის არის უშიშროების საბჭოს მუდმივმოქმედი წევრი. მან დაარღვია გაეროს წესდება საქართველოზე თავდასხმით, ყირიმის ანექსიით და იმით, რომ პირდაპირ მონაწილეობდა ომში აღმოსავლეთ უკრაინაში“, - განაცხადა დალია გრიბაუსკაიტემ.
პოლონეთის პრეზიდენტმა, ანჟეი დუდამაც ისაუბრა გაეროს გენერალურ ასამბლეაზე საქართველოს შესახებ. მისი თქმით, 10 წელია, საქართველოში ირღვევა გაეროს ფუნდამენტური წესები, როგორიცაა მაგ: საზღვრების ურღვევობის პრინციპი და ა.შ.
„პოლონეთი ასევე ისურვებს, ხელი შეუწყოს საერთაშორისო წესრიგს, რომელიც დამყარებული იქნება პოლიტიკური სუვერენიტეტისა და ტერიტორიული მთლიანობის პრინციპებზე. ნებისმიერი მცდელობა, რომელიც დაარღვევს ამ პრინციპებს, შეასუსტებს ამ საერთო ნდობას. საქართველოში თითქმის 10 წელია და უკრაინაში 3 წელია, აშკარად ვხედავთ გაეროს ფუნდამენტური წესების დარღვევას. მათ შორის - საზღვრების ურღვევობის პრინციპის, სუვერენიტეტის პატივისცემის, დავისა და კონფლიქტის დროს სამხედრო ძალის გამოუყენებლობისა და ა.შ.“ - განაცხადა ასამბლეაზე პოლონეთის პრეზიდენტმა.
სლოვაკეთის პრეზიდენტის, ანდრეი კისკას თქმით, წინდაუხედავი, პირადი ინტერესების გამო, საფრთხის ქვეშ დგება საერთაშორისო უსაფრთხოება და მშვიდობა. მისი თქმით, ასეთი ფაქტები ხდება საქართველოში, უკრაინასა და მოლდავეთში, აგრესიული მეზობლის გამო.
„ჩვენ ვართ მოწმეები იმისა, რომ წინდაუხედავი ინტერესების გამო გვაქვს არასტაბილურობა. ეს ძირს უთხრის მცდელობას, შევინარჩუნოთ საერთაშორისო უსაფრთხოება და მშვიდობა. გაეროს წესდების მთავარი ნაწილი, ერებს შორის დავიცვათ საერთაშორისო მშვიდობა, შეეწირა პირად, ეგოისტურ ინტერესებს, ხოლო მათი საუბარი ხშირად მიმართულია იმისკენ, რომ დაფარონ ძალადობა, საერთაშორისო წესრიგის დარღვევა და სუვერენიტეტისადმი უპატივცემულობა. ეს არის საშიში თამაში, რომელსაც მოჰყვება ტრაგიკული და გაუთვალისწინებელი შედეგები. ჩვენ ამას ვხედავთ ევროპაშიც, უკრაინაში, საქართველოსა და მოლდავეთში. ამ ქვეყნებმა იციან მშვიდობის ფასი. მათ კარგად იციან, თუ როგორი ტკივილია აგრესიული მეზობელისგან სახელმწიფო სუვერენტიტის დარღვევა, იმ მეზობლისგან, რომელიც ფიქრობს, რომ ეს წესები მას არ ეხება“, - თქვა სლოვაკეთის პრეზიდენტმა.
