შსს-მ სახალხო დამცველის განცხადება, რომ უწყებამ მისი წარმომადგენლების მუშაობა შეაფერხა, სამინისტროს წინააღმდეგ მიზანმიმართულ კამპანიად შეაფასა. სამინისტროს განცხადებით, დაკავებული პირების ნახვის საშუალება ომბუდსმენის წარმომადგენლებს ობიექტური გარემოებების გათვალისწინებით მიეცათ, პირველივე ფიზიკური შესაძლებლობის შექმნისთანავე. „ამდენად, გაკვირვებას გამოვთქვამთ სახალხო დამცველის მხრიდან აღნიშნული ფაქტის არასწორი ინტერპრეტაციის გამო.“ - წერია შსს-ს განცხადებაში.
შსს-ს განცხადებით, სახალხო დამცველმა ბოლო დროს მიზანმიმართული კამპანია დაიწყო სამინისტროს დისკრედიტაციისთვის. ამის გამო, ომბუდსმენი აბსურდულ ბრალდებებს უყენებს უწყებას და ამით თვითდისკრედიტაციასაც ახდენს. „როდესაც სახალხო დამცველი პოლიციას ადანაშაულებს სისასტიკესა და ძალის გადამეტებაში, მხოლოდ მძიმე დანაშაულისთვის ბრალდებული პირის მონათხრობის საფუძველზე, მით უფრო, იმ დროს, როცა აღნიშნული პირი მისი მეუღლის ნათესავი და მის ოჯახთან დაახლოებულია, იყენებს სახალხო დამცველის მანდატს ყაჩაღობაში ბრალდებული ნათესავის გასამართლებლად, ვფიქრობთ, დასკვნები თავად საზოგადოებამ უნდა გააკეთოს.“ - წერს სამინისტრო.
შსს-ს განცხადებით, სახალხო დამცველს ბრალდებული პირებისგან განსხვავებით, პოლიციელთა უფლებები არასდროს დაუცავს. მაშინ როცა სამინისტროს გენერალური ინსპექცია ნებისმიერ გადაცდენაზე რეაგირებს. შსს ომბუდსმენს მოუწოდებს, იყოს კრიტიკული დამკვირვებელი, მაგრამ თავი აარიდოს დაუსაბუთებელ ბრალდებებს და კონსტრუქციულად ითანამშრომლოს სამინისტროსთან.