ისრაელის პრემიერ-მინისტრმა, ბენიამინ ნეითანიაჰუმ გადაწყვეტილება მიიღო, რომ აშშ-ის პარალელურად UNESCO ისრაელმაც დატოვოს. „მამაცური და მორალური“ უწოდა მან შეერთებული შტატების გადაწყვეტილებას, დაეტოვებინა იუნესკო ანტიებრაული გადაწყვეტილებების გამო. აშშ-ს UNESCO-ს სრულუფლებიანი წევრობა 2018 წლის ბოლოს შეუჩერდება, ორგანიზაციაში ამერიკულ წარმომადგენლობას ახალი სადამკვირვებლო მისია ჩაანაცვლებს.

UNESCO-ში საბიუჯეტო კონტრიბუცია აშშ-მა, ჯერ კიდევ, 2011 წელს შეწყვიტა. მაშინ ორგანიზაციაში პალესტინა სრულუფლებიან წევრად მიიღეს. ისრაელის მხარდაჭერასთან ერთად, აშშ-ის პრეზიდენტი დონალდ ტრამპი უკმაყოფილებას გამოთქვამს ამერიკის ზედმეტად დიდ წილზე გაეროს ბიუჯეტის შევსებაში. აქამდე, აშშ საერთაშორისო ორგანიზაციის რეგულარული ბიუჯეტის 22%-ს, ხოლო გაეროს მშვიდობის მისიების 28%-ს ავსებდა.

UNESCO-ის ხელმღვანელის, ირინა ბოკოვას თქმით, აშშ-ის ეს გადაწყვეტილება „გაერთიანებული ერების ოჯახისა“ და მისი მრავალფეროვნებისთვის დიდი დანაკარგია.

ფოტო: AFP