ცენტრალური საარჩევნო კომისიის თავმჯდომარე თამარ ჟვანია ამბობს, რომ ის ვერ ხედავს წინასაარჩევნო წესების დარღვევას საქველმოქმედო საფეხბურთო მატჩის შემდეგ ანდრეი შევჩენკოსა და პაოლო მალდინის განცხადებებში.
როგორც მან განაცხადა, ადმინისტრაციული რესურსის გამოყენება ან აგიტაცია მაშინ აღინიშნება, როდესაც თვითონ ღონისძიებაა წინასაარჩევნო აგიტაციის მიზნებისთვის ორგანიზებული.
„ამასთან დაკავშირებით როგორც პოლიტიკურმა პარტიებმა ასევე, არასამთავრობო ორგანიზაციებმა მოგვმართა. ეს არ იყო წინასაარჩევნო კამპანიის მიზნებისთვის ორგანიზებული ღონისძიება. ადმინისტრაციული რესურსის გამოყენება ან აგიტაცია ხდება მაშინ, როდესაც თვითონ ღონისძიებაა წინასაარჩევნო აგიტაციის მიზნებისთვის ორგანიზებული. ჩვენ ყველას გავეცით შესაბამისი პასუხი. მე პირადად ვერც შევჩენკოს განცხადებაში და ვერც მალდინის კონკრეტული აზრის გამოხატვაში კამპანიის წესების დარღვევას ვერ ვხედავ. ამ კონკრეტულ შემთხვევაში არანაირად არ შემდგარა ადმინისტრაციული სამართალდარღვევათა ოქმი”,- განაცხადა თამარ ჟვანიამ.
ახალგაზრდა იურისტთა ასოციაციამ განაცხადა, რომ საქველმოქმედო მატჩში მონაწილეობით კალაძე კანონს დაარღვევდა. ორგანიზაციამ ამის შესახებ ცესკოს, სახელმწიფო აუდიტის სამსახურსა და უწყებათშორის კომისიას მიმართა.
