1 ივლისიდან 15 ოქტომბრის ჩათვლით, საარჩევნო სუბიექტებმა ჯამში 12,998,651 ლარი მიიღეს. ამის შესახებ ინფორმაციას აუდიტის სამსახური ავრცელებს.
აუდიტის სამსახურის ანგარიშის მიხედვით, „ქართულმა ოცნებამ“ 1 ივლისიდან 15 ოქტომბრის ჩათვლით 11,640,441 ლარი მიიღო.
„ევროპულმა საქართველომ“ - 931,083 ლარი
„ნაციონალურმა მოძრაობამ“ - 108,149 ლარი
პატრიოტთა ალიანსი - 63,142 ლარი
ახალი საქართველო - 35,100 ლარი
ალექსანდრე ელისაშვილი - 31,431 ლარი
აუდიტის სამსახურის ინფორმაციით, არჩევნების პერიოდში სამსახურმა 4 სამართალდარღვევის ოქმი შეადგინა პოლიტიკური გაერთიანებების წინააღმდეგ, ხოლო 61 ოქმი დამოუკიდებელი კანდიდატების წინააღმდეგ, რომლებიც პერიოდულად იგზავნება თბილისის საქალაქო სასამართლოში.
აღნიშნულის გარდა, შესული საჩივრებისა და მედიამონიტორინგის შედეგად მიღებული ინფორმაციების საფუძველზე, სახელმწიფო აუდიტის სამსახურმა 15 საკითხთან დაკავშირებით დაიწყო ადმინისტრაციული წარმოება: გამოთხოვილია დამატებითი ინფორმაცია და გამოსაკითხად დაბარებულები არიან შესაბამისი პირები.
2017 წლის არჩევნებში დარეგისტრირდა 300-ზე მეტი საარჩევნო სუბიექტობის კანდიდატი, საიდანაც კანდიდატურების მოხსნის შემდგომ, არჩევნების დღისათვის დარჩა 22 პოლიტიკური პარტია, 5 საარჩევნო ბლოკი, ხოლო 201 საინიციატივო ჯგუფიდან - 11 მერობის და 190 მაჟორიტარობის კანდიდატი.