2016 წლის 1 სექტემბრიდან 2017 წლის 1 სექტემბრამდე სახალხო დამცველის აპარატში შესული 201 განცხადებიდან, საქმეთა 11% სექსუალური ორიენტაციისა და გენდერული იდენტობის ნიშნით დისკრიმინაციას ეხებოდა.
დისკრიმინაციის წინააღმდეგ ბრძოლის შესახებ სახალხო დამცველის 2017 წლის სპეციალურ ანგარიშში აღნიშნულია, განსხვავებული მოსაზრების ნიშნით დევნის (12%) შემდეგ, საქმეების ყველაზე დიდი წილი სექსუალური ორიენტაციის ნიშნით დევნაზე მოდის.
„შესწავლილი განცხადებები ცხადყოფს, რომ ლგბტ თემის წარმომადგენლები ერთ-ერთი ყველაზე დაუცველი ჯგუფია, რომლის წევრებიც დისკრიმინაციას საზოგადოებრივი ცხოვრების თითქმის ყველა სფეროში აწყდებიან. მიუხედავად ამისა, ლგბტ თემის წარმომადგენლები მათ მიმართ განხორციელებული სავარაუდო დისკრიმინაციის ფაქტების გასაჯაროებას ხშირ შემთხვევაში ერიდებიან. სამწუხაროდ, საზოგადოებაში კვლავ მყარად არის ფესვგადგმული ნეგატიური სტერიოტიპული განწყობები ლგბტ თემის წარმომადგენელთა მიმართ, რაც ხელს უშლის მათ რიგი უფლებებით სარგებლობაში და აქეზებს მათ მიმართ შეუწყნარებლობასა და ძალადობას“ - წერია ანგარიშში.
ომბუდსმენი აღნიშნავს, რომ ხშირია შემთხვევები, როცა ლგბტ თემის წარმომადგენლები დისკრიმინაციას მომსახურების მიღებისას აწყდებიან. ამასთან, ზოგიერთ შემთხვევაში, განმცხადებლები დისკრიმინაციას ექვემდებარებიან, მიუხედავად იმისა, მიეკუთვნებიან თუ არა ლგბტ თემს, რაც მათი გარეგნობით, ჩაცმის სტილით თუ ქცევით არის განპირობებული.
სახალხო დამცველის საქმეებში მოხვდა ისეთი შემთხვევები, როგორებიცაა: ტაქსის მძღოლს მიერ ტრანსგენდერი ქალისთვის მომსახურების გაწევაზე უარი, ერთი და იმავე სქესის წარმომადგენელი წყვილის ღამის კლუბიდან გაგდების შემთხვევა, ქირავნობის ხელშეკრულების მოშლა აღქმით დისკრიმინაციის საფუძველზე.
ნიშნის მიხედვით დისკრიმინაცია შემდეგნაირად ნაწილდება:
- განსხვავებული მოსაზრების (12%)
- სექსუალური ორიენტაციისა და გენდერული იდენტობის (11%)
- რელიგიის (10%)
- პოლიტიკური შეხედულების (9%)
- შეზღუდული შესაძლებლობის (9%)
- ეთნიკური წარმომავლობის (7%)
- სქესის (6%)
- ასაჯუს (4%)
- მოქალაქეობის (4%)
- სხვა ნიშანი (13%)
- დისკრიმინაციისგან დაცული საფუძველი არ გამოიკვეთა (13%)
