სახალხო დამცველის ინფორმაციით,  2016 წლის 1 სექტემბრიდან 2017 წლის 1 სექტემბრამდე პერიოდში, სარფის საბაჟო-გამშვებ პუნქტზე სახელმწიფოსთვის ლიტერატურის ნებაყოფლობით გადაცემის 7 შემთხვევა დაფიქსირდა. შვიდივე შემთხვევაში წიგნები ისლამის შესახებაა და მათ შორის არის ყურანიც - ამის შესახებ ომბუდსმენის 2017 წლის სპეციალურ ანგარიშშია ნათქვამი, რომელიც დისკრიმინაციის წინააღმდეგ ბრძოლისა და თანასწორობის მდგომარეობას ასახავს.

შესაბამის ინფორმაციას, რომელიც ომბუდსმენმა შემოსავლების სამსახურიდან გამოითხოვა, თან ერთვოდა იმ პირთა სია, რომლებმაც სახელმწიფოს ნებაყოფლობით გადასცეს მითითებული წიგნები.

„მოპოვებული მასალებით გამოიკვეთა, რომ სარფის საბაჟო-გამშვები პუნქტის კვეთისას, სავიზო-საპასპორტო კონტროლის განმახორციელებელი ორგანოების - შსს საპატრულო პოლიციის დეპარტამენტისა და სსიპ შემოსავლების სამსახურის საბაჟო დეპარტამენტის მხრიდან დაბრკოლებები ექმნებოდათ მუსლიმ პირებს. სხვა პირებთან შედარებით, მათ აყოვნებდნენ და შემოწმების ხანგრძლივი პროცედურის დროს უსვამდნენ პირადი ხასიათის შეკითხვებს გარეგნობის, რელიგიური აღმსარებლობის, წარსული, თურქეთში კავშირების და ცხოვრების წესის შესახებ. ამასთან, ყველანაირ პირობას უქმნიდნენ სკუთრებაში არსებული რელიგიური ლიტერატურის დასათმობად“ - ნათქვამია ანგარიშში.

ომბუდსმენი მიიჩნევს, რომ ფაქტები მიმოსვლის თავისუფლებისა და საკუთრების უფლების შეზღუდვის გზით რელიგიის თავისუფლებაში ჩარევას წარმოადგენს.

სახალხო დამცველის შეფასებით, განმცხადებლებისა და სხვა გამოკითხულთა დაყოვნება, რელიგიური ატრიბუტიკისა თუ ნივთების შემოტანაზე შექმნილი დაბრკოლებები მათში რელიგიური აქტივობის დათრგუნვას ემსახურება.

საანგარიშო პერიოდში აპარატში შესული 201 განცხადებიდან რელიგიური ნიშნით დისკრიმინაციას 10% ეხებოდა.

 ნიშნის მიხედვით დისკრიმინაცია შემდეგნაირად ნაწილდება:

• განსხვავებული მოსაზრების (12%)
• სექსუალური ორიენტაციისა და გენდერული იდენტობის (11%)
• რელიგიის (10%)
• პოლიტიკური შეხედულების (9%)
• შეზღუდული შესაძლებლობის (9%)
• ეთნიკური წარმომავლობის (7%)
• სქესის (6%)
• ასაჯუს (4%)
• მოქალაქეობის (4%)
• სხვა ნიშანი (13%)
• დისკრიმინაციისგან დაცული საფუძველი არ გამოიკვეთა (13%)

ანგარიშში აღნიშნულია, რომ რელიგიურ უმცირესობებს შორის, ომბუდსმენმა ძირითადად მუსლიმი თემის მიმართ განხორციელებული დისკრიმინაციის ფაქტები გამოავლინა, რაც უკავშირდება ინდოქტრინაციას საჯარო სკოლებში, საზღვრის კვეთას, ასევე შენობით სარგებლობის პრობლემას.