გასულ კვირას მომხდარი კონფლიქტის შემდეგ მეტალოპლასტმასის და ალუმინის მწარმოებელ კომპანია „ალბატროსში" პროფკავშირი დაფუძნდა, - ამის შესახებ ინფორმაციას პროფკავშირების გაერთიანება ავრცელებს.
„ავჭალაში კომპანიის საწარმოში ინციდენტი გასულ კვირას მოხდა. „ალბატროსის“ მუშებსა და ხელმძღვანელობას შორის დაპირისპირების მიზეზი - არასწორად დარიცხული ხელფასი და ბუღალტრული შეცდომა გახდა. ადმინისტრაცია თანამშრომელთა ნაწილს შეცდომით ზედმეტ თანხას ურიცხავდა და შეცდომის აღმოჩენისას თანამშრომლებთან შეხვედრა გადაწყდა და შეთანხმებაც მოხდა, თუმცა ხელმძღვანელის კაბინეტის დატოვების შემდეგ რამდენიმე მუშას დაცვის შვიდი წევრი დახვდა, რომლებმაც ისინი ერთ-ერთ ოთახში ჩაკეტეს და სცემეს. მომხდარის გამო, საწარმოში თანამშრომლების დიდ ნაწილს და ადმინისტრაციის წარმომადგენლებს შორის ვითარება გამწვავდა.
დავაში პროფკავშირების ჩართვის შემდეგ კომპანია „ალბატროსის" დამფუძნებელსა და თანამშრომლებს შორის მოლაპარაკებების მშვიდობიანად წარმართვა და დასრულება გახდა შესაძლებელი. შეთანხმება 7 ოქტომბერს გაფორმდა. „ალბატროსიდან" დაცვის წევრები დაითხოვეს, მონიტორინგის სამსახურის უფროსს კი დროებით შეუჩერეს უფლებამოსილება.
დავის მოლაპარაკებებით დასრულების შემდეგ, თანამშრომლებმა პროფკავშირის შექმნა გადაწყვიტეს", - ნათქვამია პროფკავშირების განცხადებაში.
განცხადების მიხედვით, გუშინ, შპს „კომპანია ალბატროსის" პირველადი პროფკავშირული ორგანიზაციის დამფუძნებელი კრება გაიმართა.
დამფუძნებელი კრება საინიციატივო ჯგუფმა მოიწვია და მას კომპანიის 50-მდე თანამშრომელი დაესწრო. კრებამ აირჩია ორგანიზაციის თავმჯდომარე, მოადგილე და კომიტეტის 17 წევრი.
დამფუძნებელმა კრებამ პირველადი პროფკავშირული ორგანიზაციის თავმჯდომარეს, მოადგილეს და კომიტეტს უკვე დაავალა კოლექტიური საკითხების მომზადება და მოლაპარაკებების დაწყება კომპანიის ადმინისტრაციასთან.
კომპანია „ალბატროსიდან“ დაცვის თანამშრომლები გაათავისუფლეს
