ცენტრალური საარჩევნო კომისიის ინფორმაციით, თვითმმართველობის არჩევნებში ამომრჩეველთა აქტივობა საქართველოს მასშტაბით 45% იყო, ხოლო თბილისში - 43%.
ცესკოში დღეს 1468 ზარი და 134 შეტყობინება შევიდა, თუმცა მათი უმეტესი ნაწილი პროცედურებსა და სიების გადამოწმებას ეხებოდა.
დღეს მუნიციპალიტეტის წარმომადგენლობითი ორგანოს - საკრებულოს და თვითმმართველი ქალაქის/თვითმმართველი თემის მერის არჩევნები გაიმარა. ამომრჩევლებს 64 საკრებულოს 2058 წევრი და 64 მერი უნდა აერჩიათ.
2017 წლის 21 ოქტომბრის ადგილობრივი თვითმმართველობის წარმომადგენლობით ორგანოთა არჩევნებისთვის ცესკოში რეგისტრირებული იყო 22 პოლიტიკური პარტია, 5 საარჩევნო ბლოკი და ერთი საინიციატივო ჯგუფი, ხოლო საოლქო საარჩევნო კომისიების მიერ რეგისტრირებული იყო 200 საინიციატივო ჯგუფი.
არჩევნებისათვის რეგისტრირებულია მერობის 369 კანდიდატი, მათ შორის 13 თბილისში. რეგისტრირებული მაჟორიტარი კანდიდატების რაოდენობა 4727-ს შეადგენს. პარტიული სიების მიხედვით საკრებულოს წევრობის კანდიდატების რაოდენობა 12 902-ია.
არჩევნებს აკვირდებოდა საარჩევნო სუბიექტების 54 000-ზე მეტი (54 389) წარმომადგენელი, ადგილობრივი დამკვირვებელი ორგანიზაციების 20 000-ზე მეტი (20 641) და საერთაშორისო ორგანიზაციების 581 დამკვირვებელი. საარჩევნო პროცესს გააშუქებს 4000-ზე მეტი (4 820) ჟურნალისტი.