დონალდ ტრამპის ადმინისტრაციის წევრი, მდივანი ვაჭრობის საკითხებში ვლადიმერ პუტინის მოკავშირეებთან ბიზნესურთიერთობაში ამხილეს. „სამოთხის დოკუმენტები" - ასე ეწოდება ჟურნალისტურ გამოძიებას, ოფშორულ კომპანიებში დაცული ქონების შესახებ.
დოკუმენტების თანახმად, უილბურ როსს ბიზნესურთიერთობა ჰქონდა, მათ შორის, ისეთ პირებთან, რომელთა მიმართაც აშშ-ს სანქციები აქვს დაწესებული.
როგორც აღმოჩნდა, როსი დაინტერესებული იყო Navigator Holdings-ით, რომელიც რუსული ფირმა Sibur-ისთვის ნავთობისა და გაზის ტრანსპორტირებით ყოველწლიურად მილიონებს გამოიმუშავებს. Sibur-ის ორი მთავარი მეწილე აშშ-ის მიერ არის სანქცირებული.
Sibur-ის ერთ-ერთი მეწილე ვლადიმერ პუტინის სიძე კირილ შამალოვია. იგი ფირმის 3.9%-იან წილს ფლობს. მსხვილ მეწილეთა შორის ასევე არიან გენადი ტიმჩენკო, რომელთანაც 12-მდე კომპანიაა დაკავშირებული და რომელსაც აშშ-მა ინდივიდუალურად დაუწესა სანქცია და ლეონიდ მიკელსონი, რომლის მთავარი კომპანია Novatek-იც ასევე სანქცირებულია. სანქციები არ შეხებია თავად კომპანია Sibur-სა და შამალოვს, თუმცა ამ უკანასკნელის მამა, ნიკოლაი შამალოვი ასევე სანქცირებულ პირთა სიაშია.
აღნიშნულ მეწილეებს როსი არასდროს შეხვედრია. აშშ-მა სანქციები რუსეთის მიერ ყირიმის 2014 წლის ანექსიის შემდეგ გამოსცა.
BBC-ის ინფორმაციით, გაჟონილი ინფორმაცია შეკითხვებს გააჩენს რუსეთთან დონალდ ტრამპის გუნდის კავშირის შესახებ.
გამოაშკარავებული ფინანსური დოკუმენტები ცხადყოფს, რომ მსოფლიო მასშტაბით უამრავი მდიდარი და ცნობილი ადამიანი ფულს ოფშორულ კომპანიებში ინახავს. BBC-ის ინფორმაციით, მათ შორის არის ინგლისის დედოფალი ელიზაბეთ მეორეც.
„სამოთხის დოკუმენტები" 13,4 მლნ-მდე დოკუმენტს მოიცავს. მათ დამუშავებაზე 100-მდე მედიაორგანიზაცია მუშაობდა, მათ შორის BBC Panorama.
„პანამის დოკუმენტების" მსგავსად, ფაილები ამჯერადაც გერმანულმა გაზეთმა Süddeutsche Zeitung-მ მოიპოვა და დასამუშავებლად „გამომძიებელ ჟურნალისტთა საერთაშორისო კონსორციუმს" გადასცა.
