„ევროპული საქართველო - თბილისის” წევრებმა დატოვეს თბილისის საკრებულოში კომისიების გაფართოებული სხდომა, რომელზეც თბილისის ახალი მთავრობის წევრების კანდიდატურებს განიხილავენ. განცხადება სხდომის დატოვების შესახებ ფრაქციის თავმჯდომარემ გოკა გაბაშვილმა გააკეთა.
დღეს საკრებულოს სხდომაზე გამგებლები და საქალაქო სამსახურის უფროსები უნდა დაამტკიცონ. შეხვედრას არ ესწრება თბილისის არჩეული მერი კახა კალაძე. ოპოზიციურმა პარტიებმა კახა კალაძე საკრებულოში არმისვლის გამო გააკრიტიკეს
„მასთან გვქონდა შეკითხვები: რატომ დარჩა პოსტებზე იგივე ნარმანიას გუნდი, რომელსაც აკრიტიკებდა წინასაარჩევნო პერიოდში? რატომ დაემატა ამას ქსენოფობიური, ჰომოფობიური და კაცთმოძულე ენის მქონე წარმომადგენლები? რატომ დარჩა სუს-ის კონტროლი? და ა.შ. ძალიან ბევრი შეკითხვა, რაზეც მოველოდით, რომ ბატონი კახი, როგორც წესი და რიგია, როგორც პოლიტიკური კულტურა მოითხოვს, მობრძანდებოდა და გვიპასუხებდა.
არ გაწუხებთ, რომ ახლად არჩეული მერი ახლად არჩეულ საკრებულოში არ მოვიდა? როგორც ვიცი თამადაც გყავთ, და ამ სიამტკბილობაში დაგტოვებთ და შემოგიერთდებით საკრებულოს სხდომაზე“, - მიმართა გაბაშვილმა საკრებულოს უმრავლესობას.
კომისიების გაერთიანებული სხდომის დასრულების შემდეგ საკრებულოს სხდომა დაიწყო, რომელშიც „ევროპული საქართველოს" წევრები ჯერჯერობით მონაწილეობენ.