„ყველაზე მეტად რაც გვაღელვებს, მოსახლეობის უსაფრთხოებაა. ყურადღებით ვაკვირდებით პროცესს და ვიცით, რომ გარკვეული ზომები მოსახლეობის უსაფრთხოებისთვის მიღებულია და ეს ძალიან მნიშნველოვანია“, - ასე ეხმაურება საქართველოში ამერიკის ელჩი, იან კელი გაბრიელ სალოსის ქუჩაზე მიმდინარე კონტრტერორისტულ სპეცოპერაციას.
მისი შეფასებით, ორი საკითხია მნიშვნელოვანი - ადამიანების უსაფრთხოება და გამჭვირვალობა.
„აქ ორი საკითხია გასათვალისწინებელი, პირველი, რომ გარანტირებული უნდა იყოს ადამიანების უსაფრთხოება, მეორე, როდესაც სპეცოპერაცია დასრულდება, სამართალდამცავმა ორგანოებმა გამჭვირვალედ მიაწოდონ ინფორმაცია მოსახლეობას," - განაცხადა იან კელიმ.
გაბრიელ სალოსის ქუჩაზე სპეცოპერაცია რამდენიმე საათია მიმდინარეობს. ისმოდა სროლისა და აფეთქების ხმა. სუს-ის ინფორმაციით, აღნიშნული პირები არ არიან საქართველოს მოქალაქეები და არიან ტერორისტული ორგანიზაციის წევრები.
„რამდენიმე საათის განმავლობაში, სუს-ის კონტრტერორისტული დეპარტამენტი ოპერაციის საწყის ეტაპზე, აწარმოებდა მოლაპარაკებებს მათთან სამართალდამცველებისთვის ჩაბარების თაობაზე, რაზეც მათ უარი განაცხადეს.
დანაშაულებრივი ჯგუფის წევრებმა გახსნეს ცეცხლი ავტომატური ცეცხლსასროლი იარაღიდან და ხელყუმბარები ისროლეს. სროლის შედეგად, სუს-ის სპეციალური ოპერატიული დეპარტამენტის ერთი თანამშრომელი დაიჭრა“.
