კულტურის სამინისტროს ინფორმაციით, უშგულის თემის სოფელ ჩაჟაშის კოშკებისა და მაჩუბების რეაბილიტაცია, რომელიც 2014 წლიდან მიმდინარეობს, 2020 წელს დასრულდება.

სამინისტროს მიერ გავრცელებული ინფორმაციით, ამ დროისთვის, ჩაჟაშში მდებარე 40-მდე კოშკიდან და მაჩუბიდან 30-ზე მეტი ისტორიული ძეგლი უკვე რეაბილიტირებულია. ასევე დასრულდა მაცხოვრის სახელობის ეკლესიის ქვის კონსერვაციისა და სახურავის მოწყობის სამუშაოები.

„მიმდინარე წელს შეკეთდა ნიჟარაძეების 12 საგვარეულო მაჩუბი და კოშკი, რომელთა მნიშვნელოვანი ნაწილის ფიქალის ქვის გადახურვა სრულად შეიცვალა და განახლდა.

2016 წლიდან რეაბილიტაციის პროცესში კულტურული მემკვიდრეობის დაცვის სააგენტოსთან ერთად ჩართულია ფონდი „ქართუ“, რომელიც მთელი ქვეყნის მასშტაბით მიმდინარე სარეაბილიტაციო-სარესტავრაციო პროექტებში, სახელმწიფო უწყების ერთ-ერთი მთავარი პარტნიორი ორგანიზაციაა. 

კულტურული მემკვიდრეობის ძეგლების დაცვისა და მოვლა-პატრონობის  სახელმწიფო პროგრამის ფარგლებში, კულტურული მემკვიდრეობის დაცვის ეროვნული სააგენტო სარეაბილიტაციო სამუშაოებს მესტიის მუნიციპალიტეტის სხვა სოფლებშიც ახორციელებს, სადაც გასული 3 წლის განმავლობაში უკვე აღდგა 70-მდე სვანური კოშკი და მაჩუბი. 

მსოფლიო მემკვიდრეობის ძეგლთა ნუსხაში დაცული კომპლექსი, რომელსაც მუზეუმის სტატუსი აქვს მინიჭებული, 13 კოშკს, 4 ციხე-სახლს, 21 მაჩუბს და 11 ხალხურ საცხოვრებელს აერთიანებს. უშგულის თემის სოფლებიდან ყველაზე მეტი სვანური კოშკი ჩაჟაშშია შემორჩენილი“,- ნათქვამია სამინისტროს მიერ გავრცელებულ განცხადებაში.