აშშ-ის პრეზიდენტმა დონალდ ტრამპმა გუშინ იერუსალიმი ისრაელის დედაქალაქად აღიარა და სახელმწიფო დეპარტამენტს დაავალა დაიწყოს მზადება შეერთებული შტატების საელჩოს თელ-ავივიდან იერუსალიმში გადასატანად.
„ამერიკა გააგრძელებს დაუღალავ მუშაობას სამშვიდობო შეთანხმების მისაღწევად, რომელიც ორივე მხარისთვის - როგორც ისრაელის, ასევე პალესტინისთვის - მისაღები იქნება. მე ყველაფერს გავაკეთებ იმისთვის, რომ ამ შეთანხმებას მივაღწიოთ“, - განაცხადა ტრამპმა.
Reuters-ის ინფორმაციით, ისრაელის პრემიერ-მინისტრმა ბენიამინ ნეთანიაჰუმ ტრამპის განცხადებას „ისტორიული და საეტაპო“ უწოდა. მაგრამ ვაშინგტონის სხვა ახლო, დასავლელი მოკავშირეები, როგორებიცაა ბრიტანეთი და საფრანგეთი ტრამპის ამ განცხადებას კრიტიკულად შეხვდნენ.
პალესტინის ლიდერმა მაჰმუდ აბასმა განაცხადა, რომ აშშ-მა ამოწურა თავისი სამშვიდობო ძალისხმევა და ის შუამავლის როლს ვეღარ შეასრულებს. მან პალესტინის საერო და ისლამისტურ ფრაქციებს მოუწოდა გააპროტესტონ აშშ-ის ეს განცხადება, რადგან არც ერთ ქვეყანას არ აქვს თავისი საელჩო იერუსალიმში.
„დროა ოფიციალურად უნდა ვაღიაროთ იერუსალიმი, როგორც ისრაელის დედაქალაქი, მიუხედავად იმისა, რომ წინა პრეზიდენტები ამ დაპირებას იძლეოდნენ, მათ ეს ვერ შეძლეს. დღეს მე ვიღებ ამ გადაწყვეტილებას“,-განაცხადა ტრამპმა.
BBC-ის ინფორმაციით, ტრამპის ამ განცხადების შემდეგ პალესტინელებმა პროტესტის ნიშნად გაფიცვა მოაწყვეს დასავლეთი სანაპიროსა და ღაზას სექტორში. ისინი ცდილობენ აიღონ ქუჩები. ისრაელმა ასობით ჯარისკაცი დაამატა დასავლეთ სანაპიროს, რათა დაძაბულობა თავიდან იქნას აცილებული. ბოლო ინფორმაციით, შეტაკებების შედეგად 8 პალესტინელი დაშავდა.
