პარლამენტმა კონსტიტუციაში შესატანი ცვლილებების პროექტი მეორე მოსმენით მიიღო. მას მხარი 115-მა დეპუტატმა დაუჭირა. პროექტს მესამე მოსმენით საგაზაფხულო სესიაზე განიხილავენ.

კანონპროექტის მიხედვით, საქართველოს კონსტიტუციის მე-5 მუხლს პუნქტი ემატება, რომლის მიხედვითაც, „სახელმწიფო ზრუნავს გარემოს დაცვასა და ბუნებრივი რესურსებით რაციონალურ სარგებლობაზე“.

პროექტით, უზრუნველყოფილი ხდება აკადემიური თავისუფლება და უმაღლესი საგანმანათლებლო დაწესებულების ავტონომია.

რაც შეეხება ორმაგი მოქალაქეობის რეგულაციას, აპრილში დადგინდება ის პირობები, რომლის თანახმადაც, სხვა ქვეყნის მოქალაქეობის შეძენა ავტომატურად საქართველოს მოქალაქეობის შეწყვეტის საფუძველი აღარ გახდება.

ამასთან, გახანგრძლივდა მინიმალური ვადა და საარჩევნო დავაზე მსჯელობისთვის საკონსტიტუციო სასამართლოს, სულ მცირე, ექვსი თვე ექნება. პროექტის თანახმად,  იუსტიციის უმაღლესი საბჭოს შემადგენლობაში 14 წევრი და უზენაესი სასამართლოს მოსამართლე შედიან. ასევე, დაკონკრეტებულია იუსტიციის საბჭოს მდივნის არჩევის წესი.