თბილისის მერის, კახა კალაძის თქმით, ქალაქის განვითარების დოკუმენტი ჯერ კიდევ დაუსრულებელია და იმისთვის, რომ ამ სახით გენგეგმის მიღებამ მომავალში დამატებითი პრობლემები არ შეუქმნას ქალაქს, კიდევ ბევრი სამუშაოა შესასრულებელი.
დედაქალაქის მერია „სითი ინსტიტუტს“ მიმართავს, რომ დღის ბოლომდე წარუდგინონ გონივრული ვადა, როდისთვის შეძლებენ გენგეგმის სრულყოფილი დოკუმენტის მომზადებას. „კონტრაქტორ კომპანიას, ხელშეკრულების პირობების გათვალისწინებით, რამდენჯერმე ეცნობა ჩვენი პოზიცია, თუმცა, სამწუხაროდ, გენგეგმის მეექვსე, დასკვნითი დოკუმენტი ჯერ კიდევ ვერ აკმაყოფილებს მოთხოვნილ სტანდარტებს”, - განაცხადა თბილისის მერიაში გამართულ ბრიფინგზე კახა კალაძემ.
კალაძის თქმით, სრულყოფილი გენგეგმის არსებობა ურბანული განვითარებისა და კულტურული მემკვიდრეობის შენარჩუნებისთვის სასიცოცხლოდ მნიშვნელოვანია. ეს მიმართულება კი მერიისთვის პრიორიტეტულია. როგორც კალაძემ განაცხადა, მერია ითვალისწინებს კონტრაქტორი კომპანიის უკვე გაწეულ სამუშაოს და ამიტომ კიდევ ერთხელ მისცემენ გენგეგმის წარდგენის შესაძლებლობას. „ყველაფრის გათვალისწინებით, კიდევ ერთხელ ვაძლევთ მათ შესაძლებლობას საკუთარი რესურსების გათვალისწინებით დღის ბოლომდე წარმოადგინონ გონივრული ვადა, თუ როგორ და რა ვადებში შეძლებენ ამ დოკუმენტის სრულყოფას. ჩვენი მხრივ, მერია და მერიის მთელი სამსახურები სრულ მზადყოფნას ვაცხადებთ მათთან კონსტრუქციული თანამშრომლობისთვის, რათა იქნას მიღებული მიწათსარგებლობის გენერალური გეგმა“, - განაცხადა კახა კალაძემ.
კალაძის თქმით, იმ შემთხვევაში თუ „სითი ინსტიტუტ საქართველო" კვლავ ვერ მოახერხებს დოკუმენტში ხარვეზების გამოსწორებას, მერია თანხას აღარ გადაიხდის და ხელშეკრულება გაწყდება.
