მეცნიერებათა აკადემიის ინიციატივით, მეცნიერები, ნარკოლოგები, სასულიერო პირები და საზოგადოების წარმომადგენლები ნარკოპოლიტიკის კანონპროექტის ინიციატორებს შეხვდნენ.
ტექნიკურ მეცნიერებათა დოქტორმა, პაატა გიორგაძემ პარლამენტში ინიცირებული კანონპროექტი გააკრიტიკა და აღნიშნა, რომ ამგვარი კანონპროექტი სიდუხჭირის, გაუბედურებული ცხოვრების, ხვალინდელი უიმედობის ფონზე ერის გადაშენებაზეა მიმართული.
„ჩვენ უნდა ვიფიქროთ ხვალინდელ დღეზე... ამ თრობის შედეგად ჩვენს დემოგრაფიულ მონაცემებს ვერ გავზრდით, ისედაც დაქცევის პირას ვართ. ამიტომ ჯერ ქვეყანა დავაყენოთ ფეხზე. კი, განვითარებულ ქვეყნებშიც მკაცრადაა მოდებული ეს სენი, სოციალური რენომე, სინდრომი, მაგრამ საქართველოში დამღუპველი იქნება, ამ მცირე ერისთვის დამღუპველი იქნება ასეთი კანონები. ლიბერალური პოლიტიკის შემოღება როგორი დამღუპველიცაა, ისეთი დამღუპველი იქნება ასეთი კანონებიც. ლიბერალურ [მიდგომაშიც] ბევრი რამ კარგია, მაგრამ ჩვენ უნდა გადმოვიღოთ კარგი. რატომ გვკარნახობენ, როგორ უნდა ვიცხოვროთ, ღვინით უნდა დავთვრეთ თუ მაინცდამაინც თრიაქით გავიჟღინთოთ" , - განაცხადა მან.