შს მინისტრმა, გიორგი გახარიამ, მთავრობის სხდომის შემდეგ ჟურნალისტებთან 13 იანვარს „ბასიანთან“ მომხდარი დაჭრის ფაქტზე ისაუბრა. მისი თქმით,  იქ, სადაც პოლიციელის ღირსება შეილახება, შსს-ს ხელმძღვანელობა იქნება უკომპრომისო. 

„მე არ შევაფასებ  სასამართლოს გადაწყვეტილებას, ის ასრულებს თავის ფუნქციას. ხაზგასმით აღვნიშნავ, რომ იქ, სადაც საქმე ეხება პოლიციელის უსაფრთხოებას და მის ღირსებას, ერთმნიშვნელოვნად, ჩვენ ყველა,  შსს-ს ხელმძღვანელობა და თითოეული მოქალაქე  უნდა იყოს უკომპრომისო. იმიტომ რომ  იქ, სადაც პოლიციელის უსაფრთხოება არ არის დაცული, იმ საზოგადოების უსაფრთხოების გარანტიას ვერ მოგცემთ ვერავინ“, - განაცხადა გიორგი გახარიამ.

დღეს თბილისის სააპელაციო სასამართლოში კლუბ „ბასიანის" თანამშრომლების დაჭრასა და პოლიციელისთვის წინააღმდეგობის გაწევაში  ბრალდებული თამაზ ქვლივიძის სასამართლო პროცესი გაიმართა. თამაზ ქვლივიძეს მოსამართლემ, სპარტაკ პავლიაშვილმა, წინასწარი პატიმრობა შეუფარდა. 

თბილისის საქალაქო სასამართლომ 15 იანვარს თამაზ ქვლივიძეს აღკვეთის ღონისძიების სახით 30 000 ლარის ოდენობით გირაო შეუფარდა. რის შემდეგაც პროკურატურამ საქალაქო სასამართლოს გადაწყვეტილება სააპელაციოში გაასაჩივრა. 

გამოძიების ინფორმაციით, თამაზ ქვლივიძემ კლუბ „ბასიანთან“ დიდუბე-ჩუღურეთის სამმართველოს მე-4 განყოფილების უფროსის  მოადგილეს მიმდინარე წლის 13 იანვარს ცივი იარაღით სხეულზე  დაზიანება  მიაყენა. ინციდენტის დროს, ბრალდებულმა, ასევე, დაზიანებები  მიაყენა კლუბ  „ბასიანის“ დაცვის ორ თანამშრომელს.