საქართველოს განათლებისა და მეცნიერების სამინისტროს, მასწავლებელთა პროფესიული განვითარების ეროვნული ცენტრისა და საქართველოს ფიზიკური აღზრდისა და სპორტის სახელმწიფო სასწავლო უნივერსიტეტის ერთობლივი პროექტის ფარგლებში, საჯარო სკოლების ფიზიკური აღზრდისა და სპორტის მასწავლებელთა პროფესიული გადამზადების პირველი ეტაპი დასრულდა. ინფორმაციას განათლებისა და მეცნიერების სამინისტრო ავრცელებს. 

მათივე ცნობით, ტრენინგი თბილისის, მცხეთა-მთიანეთისა და შიდა-ქართლის სულ 300-მდე სკოლის 550-ზე მეტმა ფიზიკური აღზრდისა და სპორტის მასწავლებელმა გაიარა.

თეორიული და პრაქტიკული მეცადინეობები მსმენელებმა სპორტის სხვადასხვა სახეობაში გაიარეს, რომელსაც საქართველოს ფიზიკური აღზრდისა და სპორტის სახელმწიფო სასწავლო უნივერსიტეტის პროფესორ-მასწავლებლები, მეცნიერებათა დოქტორები და საქართველოს დამსახურებული მწვრთნელები უძღვებოდნენ. 2018 წლიდან მსგავსი პროგრამის გაგრძელება მთელი ქვეყნის მასშტაბით იგეგმება. კვალიფიკაციას 3500-ზე მეტი პედაგოგი აიმაღლებს.