საპარტნიორო ფონდის ხელმძღვანელის, დავით საგანელიძის თქმით, საქართველოში წელს ექსპლუატაციაში შევა საწარმო, რომელიც მსხვილი კომპანიების Boeing, Airbus და Bombardier-ის თვითმფრინავებისთვის ნაწილებს დაამზადებს. „ეს იქნება საპარტნიორო ფონდისა და ისრაელის ერთ-ერთი უდიდესი კომპანიის Elbit Cyclone-ის ერთობლივი საწარმო. Elbit Cyclone არის Elbit Systems შვილობილი კომპანია და ისეთი აეროგიგანტებისთვის ამზადებს ნაწილებს, როგორებიცაა: Boeing, Airbus და Bombardier. მინდა გითხრათ, რომ ეს ქარხანაც სწორედ მათთვის დაამზადებს ნაწილებს“, - თქვა ტელეკომპანია „მაესტროს“ ეთერში დავით საგანელიძემ.

საგანელიძის თქმით, საქართველოში დაიწყება, მაგალითად, კარების, პანელების, შიდა და გარე დეტალების წარმოება ცნობილი კომპანიებისთვის. „2-3 წელიწადში, როცა ჩვენი მგზავრები ამ თანამედროვე, კომფორტული თვითმფრინავებით იმგზავრებენ, უნდა იცოდნენ, რომ მათი ძალიან ბევრი ნაწილი საქართველოში იქნება დამზადებული“ - ამბობს საპარტნიორო ფონდის ხელმძღვანელი.

საწარმოს კაპიტალი 85 მილიონი იქნება, საიდანაც 25 მილიონი საპარტნიორო ფონდზე მოდის. პროექტში ჩართულია „საქართველოს ბანკიც“. საგანელიძის თქმით, საწარმოში დასაქმებულთა 90-95% ადგილობრივი იქნება. ქარხანაში სულ 300-მდე ადამიანმა უნდა იმუშავოს.

კომპოზიტური ნაწილების მწარმოებელი ქარხანა პირველ ნაწილებს გეგმისამებრ 2018 წლის ბოლოს გამოუშვებს.