თბილისის მერიის კეთილმოწყობის სამსახურის უფროსის თანამდებობას გივი კუბლაშვილი აღარ იკავებს. კუბლაშვილს არ დაუკონკრეტებია იყო თუ არა თანამდებობის დატოვების მიზეზი კეთილმოწყობის და არქიტექტურის სამსახურიდან კალაძის მიერ ორი თანამშრომლის გათავისუფლება.
თბილისის მერიაში კეთილმოწყობისა და არქიტექტურის სამსახურის ორი თანამშრომელი სამსახურიდან კალაძის გადაწყვეტილებით დღეს გაათავისუფლეს. თბილისის მერის თქმით, შიდა აუდიტის სამსახურმა რამდენიმე დარღვევა გამოავლინა და აღმოჩნდა, რომ ამ პირებმა ოჯახის წევრებთან დაკავშირებულ საქმის წარმოებაში მიკერძოებული გადაწყვეტილებები მიიღეს.
„მე არაერთხელ განვაცხადე და კიდევ ერთხელ გავიმეორებ, რომ ჩვენ გვჭირდება მხოლოდ პროფესიონალი და კეთილსინდისიერი ადამიანები, ვინც მოემსახურება ამ ქალაქს და ამ ქალაქში მცხოვრებ ადამიანებს. შესაბამისად, ასეთი ადამიანები, ვინც არაკეთილსინდისიერად მოიქცევა, ჩვენთან არ და ვერ იმუშავებს.“ - განაცხადა თბილისის მერმა მუნიციპალიტეტის მთავრობის სხდომაზე.