ხობში, სოფელ ყულევთან, კოლხეთის დაცული ტერიტორიებიდან 127 მეტრში ნავთობგადამამუშავებელი ქარხნისთვის კომპანია „ფაზის იოლიმ“ გარემოს დაცვისა და სოფლის მეურნეობის სამინისტროსგან მშენებლობის ნებართვა მოითხოვა.
გარემოზე ზემოქმედების დეპარტამენტის უფროსის მოვალეობის შემსრულებელმა, მაია ბერაძემ „ლიბერალთან“ განაცხადა, რომ კომპანია ნავთობგადამამუშავებელი ქარხნის მშენებლობას გეგმავს და სამინისტროს დოკუმენტაციაც წარუდგინა.
მაია ბერიძის თქმით, სამინისტრომ კომპანიას შენიშვნები გაუგზავნა, რომელთა გათვალისწინების შემთხვევაშიც, მშენებლობის ნებართვა გაიცემა. მისივე თქმით, მშენებლობის ნებართვის გაცემამდე კომპანიამ ეკოლოგიური ექსპერტიზის დასკვნაც უნდა წარადგინოს.
„შენიშვნებში აისახა, რომ ქარხანა მდებარეობს ეროვნული პარკიდან 127 მეტრში და ვთხოვეთ მათ, შეეფასებინათ ბიომრავალფეროვნებაზე ზემოქმედება და ეს შეფასება წარმოედგინათ სამინისტროში. მათ უნდა ჰქონდეთ კვლევა და შეფასებითი ანგარიში სრულყოფილად წარმოდგენილი“, - განუცხადა „ლიბერალს“ გარემოზე ზემოქმედების დეპარტამენტის უფროსის მოვალეობის შემსრულებელმა, მაია ბერაძემ.