„2015-2016 წლებში ახალქალაქის მუნიციპალიტეტის თანამშრომლებზე გაცემულია შრომის ანაზღაურება სულ 3 687 100 ლარის ოდენობით, მათ შორის პრემია - 852 400 ლარი“,- აღნიშნულია სახელმწიფო აუდიტის ანგარიშში, რომელიც ახალქალაქის მუნიციპალიტეტის საბიუჯეტო ხარჯების ფინანსურ და შესაბამისობის აუდიტს მოიცავს. 

ანგარიშის თანახმად, მუნიციპალიტეტს არ აქვს შემუშავებული წესი პრემიის გაცემის შესახებ, რომლითაც დარეგულირდება პრემიის გაცემის საფუძვლები. მუნიციპალიტეტი თანამშრომლებზე პრემიას ყოველკვარტალურად გასცემს. 

„ძირითადად, გაცემული პრემია შეადგენს მოხელის თანამდებობრივი სარგოს 100%-ს. ამრიგად, ახალქალაქის მუნიციპალიტეტის გამგეობამ არ გაითვალისწინა მოქმედი კანონმდებლობის მოთხოვნები, რომლის მიხედვით პრემია გაიცემა საჯარო დაწესებულებაში დასაქმებული პირების მიერ შესრულებული სამუშაოს შეფასების ან/და სათანადო დასაბუთების საფუძველზე. შედეგად, მუნიციპალიტეტის შესაბამისი პასუხისმგებელი პირების მიერ, 852 400 ლარი მუნიციპალიტეტის ბიუჯეტიდან ისეა გაცემული, რომ არ არის დასაბუთებული რის საფუძველზე განხორციელდა თანამშრომელთა პრემირება“. 

ამასთან, როგორც ანგარიშში ვკითხულობთ, 2015-2016 წლებში მუნიციპალიტეტის მიერ სამსახურებრივი უფლებამოსილების განსახორციელებლად გამოყენებული სატრანსპორტო საშუალებების რაოდენობა(9 ერთეული) 3-ით აღემატება მთავრობის დადგენილებით რეკომენდებულ ზღვრულ ოდენობას.

„აღნიშნული ავტომანქანების ექსპლუატაციისათვის, მუნიციპალიტეტის მიერ დამტკიცებული საწვავის მოხმარების ლიმიტების შესაბამისად, სააუდიტო პერიოდში დახარჯულია 172 100 ლარი“.