შვეიცარიის საელჩო საქართველოში Facebook-გვერდზე Stadler-ის მატარებლის ორ ფოტოს აქვეყნებს. პირველი მათგანი საქართველოში, მოლითთან (ხარაგაულის მუნიციპალიტეტი) არის გადაღებული, მეორე კი - შვეიცარიაში. „ეს ორი შვეიცარიული მატარებელი შვეიცარიასა და საქართველოშია გადაღებული. არის რამე სხვაობა?“ - წერს საელჩო.

Stadler-ის ორსართულიანი მატარებლის 4 შემადგენლობა საქართველომ 2016 წლის გაზაფხულზე შეიძინა. თბილისი-ბათუმის რეისზე მატარებლებმა მოძრაობა 2016 წლის ივლისიდან დაიწყეს.

მსოფლიოში ცნობილი მატარებლების მწარმოებელი  შვეიცარიული კომპანია Stadler Rail AG ვაგონმწარმოებელი და ვაგონშემკეთებელი ქარხანის აშენებას თბილისში გეგმავს.

კომპანია Stadler-ის პრეზიდენტი, პიტერ შპულერი საქართველოს პრემიერ-მინისტრ გიორგი კვირიკაშვილს შეხვდა და რეგიონული შვილობილი კომპანიის მშენებლობის, ასევე, მოძრავი შემადგენლობების წარმოების შესახებ გადაწყვეტილება და დაგეგმილი სამუშაოები გააცნო.

მთავრობის ადმინისტრაციის პრესსამსახურის ცნობით, ახალი ქარხანა მოძრავი შემადგენლობით როგორც საქართველოს რკინიგზას, ასევე, თბილისის მეტროს უზრუნველყოფს. ტექნიკური და კომერციული მიზანშეწონილობის მიხედვით, ქარხანა საექსპორტო შეკვეთებზეც იმუშავებს.

შვეიცარიის საელჩოც მატარებლების ფოტოების განთავსებით გამოეხმაურა ქარხნის მშენებლობას. „Stadler Rail AG მსოფლიოში მატარებლების მწარმოებელი ლიდერი შვეიცარიული კომპანიაა, რომელიც 1942 წლიდან მოყოლებული მსოფლიოს 14 ქვეყანაშია წარმოდგენილი და 7’000 ადამიანი ჰყავს დასაქმებული. მალე ამ ჩამონათვალს საქართველო და საქართველოში დასაქმებულთა რაოდენობაც მიემატება.“ - წერს შვეიცარიის საელჩო.

მოლითის სარკინიგზო გზაგამტარი კი, რომელიც ხარაგაულის რაიონშია, საქართველოში ერთ-ერთი ყველაზე ძველი სარკინიგზო ინფრასტრუქტურაა.