საქართველოში აშშ-ის ელჩის რანგში თავის ბოლო სიტყვაში იან კელიმ გაიხსენა აქ ჩამოსვლის პირველი თვეები და ადამიანები, ვისაც მაშინ შეხვდა. ელჩის თქმით, პოლიტიკოსებთან, ჟურნალისტებსა და სამოქალაქო საზოგადოების წარმომადგენლებთან ერთად შეხვდა საქართველოს პატრიარქსაც, რომლის როლიც პოლიტიკას აღემატება და განასახიერებს ეროვნულ სულს.
„ჩამოსვლიდან პირველი თვეების განმავლობაში მეგობრული ურთიერთობა დავამყარე აქტიურ ლიდერებთან: პარლამენტის თავმჯდომარე დავით უსუფაშვილთან, იმ დროს ეკონომიკის მინისტრ გიორგი კვირიკაშვილთან, თავდაცვის მინისტრ ირაკლი ალასანიასთან, უმცირესობის ლიდერთან, დავით ბაქრაძესთან და ბევრ სხვასთან“, - გაიხსენა კელიმ პოლიტიკოსებთან შეხვედრა და დაამატა, რომ ასევე შეხვდა საქართველოს პატრიარქსაც. ყველა ამ ადამიანს კი ერთი რამ ჰქონდათ საერთო - ქვეყნის სიყვარული და მისი წინსვლის ერთგულება.
„მათ შორის არიან ეკლესიის წინამძღოლები, სამოქალაქო საზოგადოების ექსპერტები და გამოჩენილი ჟურნალისტები. მე შევხვდი საქართველოს მართლმადიდებელი ეკლესიის პატრიარქს, ადამიანს, რომლის როლი აღემატება პოლიტიკას და განასახიერებს ეროვნულ სულს“, - თქვა გამოსვლისას ამერიკის ელჩმა.
