კომპანია „სითი პარკი“ გამოეხმაურა კახა კალაძის გადაწყვეტილებას, გაწყვიტოს მათთან ხელშეკრულება. „სითი პარკის“ თანამფლობელების განცხადებით, მერის განცხადება საუკეთესო მაგალითია იმისა, თუ როგორ ეპყრობა საქართველოს ხელისუფლება უცხოელ ინვესტორებს. კომპანიის მფლობელები მიიჩნევენ, რომ კალაძის გადაწყვეტილება, ცალმხრივად გაწყვიტოს კომპანიასთან ხელშეკრულება უკანონო და პოლიტიკურად მოტივირებულია.
„მთელი სახელმწიფო აპარატი, ხელისუფლების სხვადასხვა შტოს ჩათვლით, გამოყენებულ იქნა კონკრეტული ძალების მიერ და მოქმედებდა კოორდინირებულად, „სითი პარკის“ საქართველოდან უკანონოდ გაძევების მიზნით. ხელისუფლება მოქმედებდა არაკეთილსინდისიერად, უგულებელყოფდა ინვესტორის მხრიდან სისტემატურ კომუნიკაციას და იმ გარემოებას, რომ ამჟამად მიმდინარეობს ორი სასამართლო პროცესი, რომელშიც შპს „სითი პარკი“ დავობს მის მიმართ კანონდარღვევის აბსურდული ბრალდებების საკითხზე. ხელისუფლება ცდილობდა შეექმნა სამართლებრივი პროცესის ილუზია მაშინ, როდესაც საბოლოო შედეგი (ხელშეკრულების უკანონო შეწყვეტა კანონზე და სასამართლოზე მაღლა მდგომი კონკრეტული ჯგუფების ინტერესების გამო) წინასწარ იყო განსაზღვრული.“ - ნათქვამია განცხადებაში.
„სითი პარკის“ განცხადებით, კომპანია ყველა შესაძლებლობას მიმართავს, რომ თავი დაიცვას საქართველოს თუ საზღვარგარეთულ სასამართლოებში. „კომპანიის მფლობელები ასევე გაავრცელებენ ამ ინფორმაციას ისრაელიას და საერთაშორისო ბიზნესსაზოგადოებაში. აღნიშნული ცალსახად უარყოფითად აისახება საქართველოს საინვესტიციო კლიმატზე, რაც, როგორც ჩანს, არ აღელვებთ ძალაუფლების მქონე ბიუროკრატებს, რომლებიც მოქმედებენ საკუთარი კერძო ინტერესებიდან გამომდინარე”, - ნათქვამია თანამფლობელების - დევიდ პილას და ნათან შორერის განცხადებაში.