დღეს, 14 მარტს, 20:00 საათზე პროექტ „მუზამეს“ ფარგლებში,,ლოს ანჯელესის ახალ დიდ ელექტრონულ არტისტად’’ წოდებული მუსიკოსი უილ უიზენფილდი, იგივე BATHS ცოცხალი შესრულებით მსმენელის წინაშე საკონცერტო დარბაზ SPACEHALL-ში წარდგება.
BATHS-მა პირველ სამოყვარულო ჩანაწერები 14 წლის ასაკში შექმნა. ის დიდ ყურადღებას უთმობდა გარემოს ხმებს, განსაკუთრებით კი წყლის ხმებს აბაზანის მიღებისას. სწორედ ამიტომ, უილი მუსიკალურ სცენაზე BATHS-ის (“აბაზანები”) სახელით გამოვიდა და მალევე იქცა ამერიკული და ევროპული მუსიკალური მედიის ახალ ფავორიტად.
BATHS-ის ჩანაწერები კალიფორნიულ ინდი ლეიბლ Anticon-ზე გამოიცემა, რომელიც ჰიპ-ჰოპზე, ელექტრონულ მუსიკასა და ინდი-როკზეა ორიენტირებული. BATHS ასევე არის საუნდტრეკის ავტორი ვიდეო თამაშისა Dream Daddy, ხოლო სხვადასხვა დროს უმუშავია ისეთ არტისტებთან ერთად როგორიცაა Daedelus, Flying Lotus და სხვები.
„ანიმეები, ვიდეო თამაშები, წიგნები და კომიქსები - გულწრფელი რომ ვიყო, ამ ყველაფერს გაცილებით მგრძნობიარედ აღვიქვამ, ვიდრე რეალურ სამყაროს. ჩემი გული აქაა, ამიტომაც მინდოდა შემექმნა ნამუშევარი, რომელიც ამ ემოციებს ასახავდა, ოღონდ, არაპირდაპირი გზით” - ასე იწყებს საუბარს თავისი ბოლო ალბომის, 2017 წლის Romaplasm-ის შესახებ BATHS.
ექსპერიმენტული მუსიკალური პროექტი Muzame - მარტში 2 წლის გახდა. გასული წლის განმავლობაში მუზამეს ფარგლებში თბილისს ისეთი არტისტები ეწვივნენ, როგორებიც არიან XIU XIU, THE IRREPRESSIBLES, JAY-JAY JOHANSON, PSYCHIC TV, MOLLY NILSSON და ა.შ. ორგანიზატორები მიიჩნევენ, რომ მათი ერთ-ერთი ყველაზე წარმატებული კონცერტი ქართველი შემსრულებლის, სტეფანეს გამოსვლა იყო.