მთავარი, რის გაკეთებასაც ჩემი დამტკიცების შემთხვევაში შევეცდები, არის ის, რომ „საზოგადოებრივი მაუწყებელი" რეალურად გახდეს საზოგადოებრივი მაუწყებელი, - ამის შესახებ სახალხო დამცველის მიერ „საზოგადოებრივი მაუწყებლის" სამეურვეო საბჭოს წევრობის კანდიდატად დასახელებულმა ზვიად დევდარიანმა განაცხადა. მისი თქმით, „საზოგადოებრივ მაუწყებელში" ძალიან სერიოზული გამოწვევებია.
„ალბათ, მთავარი, რის გაკეთებასაც ჩემი დამტკიცების შემთხვევაში შევეცდები, არის ის, რომ „საზოგადოებრივი მაუწყებელი” რეალურად გახდეს საზოგადოებრივი მაუწყებელი, რაც გულისხმობს მათ შორის იმას, რომ გაძლიერდეს კავშირები სამეურვეო საბჭოსა და სხვადასხვა ინტერესთა ჯგუფებს შორის. ვგულისხმობ უმცირესობებს, ადამიანის უფლებების სფეროში მომუშავე არასამთავრობო ორგანიზაციებს, ქალთა მოძრაობის ჯგუფებს, ყველა იმ ჯგუფს, ვინც დაინტერესებულია და ვინც აუცილებლად უნდა იყოს წარმოდგენილი, ვისი პოზიციებიც და ხედვაც აუცილებლად უნდა იყოს გათვალისწინებული „საზოგადოებრივი მაუწყებლის" პრიორიტეტებისა და ბიუჯეტის ფორმირების დროს", - განაცხადა დევდარიანმა.
სახალხო დამცველმა ნინო ლომჯარიამ პარლამენტს „საზოგადოებრივი მაუწყებლის“ მეურვეობის კანდიდატად ზვიად დევდარიანი წარუდგინა.
