ცნობილი ამერიკული ბენდი Cigarettes After Sex საქართველოში კონცერტს გამართავს. ბენდმა ინსტაგრამის ოფიციალურ გვერდზე ქართველ მსმენელს უპასუხა, რომ საქართველოში კონცერტი ივლისში გაიმართება. „ლიბერალს“ სანდო წყარომ უთხრა, რომ საქართველოში ასევე გაიმართება დანიური ექსპერიმენტული ბენდის WhoMadeWho-ს კონცერტი. 

„ლიბერალის“ ინფორმაციით, ორგანიზატორებისა და ფესტივალის სხვა მონაწილეების შესახებ ინფორმაცია ცნობილი რამდენიმე დღეში გახდება.

Cigarettes After Sex 2008 წელს დაარსდა. ბენდის პირველი EP 2012 წელს გამოვიდა, ხოლო სადებიუტო სტუდიური ალბომი - გასულ წელს, სახელწოდებით - Cigarettes After Sex. ამერიკული ამბიენტ-პოპბენდი საქართველოში ბოლო სამი წელია, განსაკუთრებული პოპულარობით სარგებლობს. 

WhoMadeWho დანიური ექსპერიმენტული პოპტრიოა, რომელიც 2003 წელს დაარსდა. ბენდმა გასულ წელს ახალი სინგლი - Dynasty გამოუშვა და დააანონსა ახალი, რიგით მე-6 ალბომიც, სახელწოდებით Through The Walls.