თბილისის მერია ქალაქში შენობების, ხიდების, გადასასვლელების მოხატვას აპირებს. ამის შესახებ თბილისის მერმა, კახა კალაძემ, მუნიციპალიტეტის მთავრობის სხდომაზე განაცხადა. კალაძის თქმით, მერიის მიერ შეთავაზებული სივრცეები ახალგაზრდებს დაეხმარება „სთრით-არტით“ ხელოვნებაში გამოხატონ თავიანთი დამოკიდებულება ქალაქის მიმართ.
„როგორც იცით, „სთრით-არტი“, ანუ ქუჩის ხელოვნება თანამედროვე ვიზუალური ხელოვნების ერთ-ერთი ყველაზე თავისუფალი ფორმა და თვითგამოხატვის საშუალებაა. ხშირად მას ურბანულ ხელოვნებასაც უწოდებენ. გმირთა მოედანზე ჩვენ ერთი ასეთი პროექტი უკვე განვახორციელეთ და ვფიქრობ, კარგი იქნება, თუ მივცემთ ჩვენს ქალაქსაც და ახალგაზრდებსაც შესაძლებლობას, რომ, ერთი მხრივ, უსახური კედლები, ხიდები და გადასასვლელები გალამაზდეს და, მეორე მხრივ, ახალგაზრდობამ ხელოვნებაში გამოხატოს დამოკიდებულება ქალაქის მიმართ.“ - თქვა თბილისის მერმა მუნიციპალიტეტის მთავრობის სხდომაზე.
ქალაქის მოსახატად სივრცეების მოძებნა და ქუჩის მხატვრობის ღონისძიებების მოწყობა კალაძემ თავის მოადგილეს, სოფიო ხუნწარიას დაავალა.