ამ წუთებში ცნობილი ხდება, რომ გუშინ, ბარნოვზე ნაპოვნი 25 წლის ქალის მკვლელობაში ეჭვმიტანილი დაკავებულია. შსს-ში ბრიფინგი მიმდინარეობს.
როგორც ბრიფინგზე გახდა ცნობილი, 1972 წელს დაბადებული ვ.ბ. ნასამართლევია და იგი 2015 წელს დამნაშავედ სცნეს საქართველოს სისხლის სამართლის კოდექსის 11 პრიმა -117-ე და 276-ე მუხლებით, რაც ოჯახის წევრის ჯანმრთელობის მძიმე დაზიანებას და ტრანსპორტის მოძრაობის უსაფრთხოების წესის დარღვევას გულისხმობს. იგი მოკლულის დედის ყოფილი მეუღლეა.
შსს-ს ცნობით, ვ.ბ პრეზიდენტმა შეიწყალა, მას სასჯელი გაუნახევრდა და საპატიმრო დაწესებულება ვადაზე ადრე 2017 წლის 25 მაისს დატოვა.
შეგახსენებთ, რომ ყელგამოჭრილი ქალი, გუშინ, 13 აპრილს, ბარნოვის ქუჩაზე, დაახლოებით 19:00 საათზე იპოვნეს.
შინაგან საქმეთა სამინისტროს ცნობით, "მკვლელობამდე რამდენიმე საათით ადრე, მოკლული თ.გ. და დედამისი პოლიციის განყოფილებაში გამოცხადდნენ" და ეჭვმიტანილის მიმართ "შემაკავებელი ორდერის გამოწერა ითხოვეს, რასაც პოლიციის მხრიდან მოჰყვა შესაბამისი რეაგირება".
შსს-ს ინფორმაციით თ.გ.- მ პირადი საქმეების გამო, პოლიციის შენობა მარტომ, დედაზე ადრე დატოვა.
გარდაცვლილი 24 წლის იყო. მას ორი მცირეწლოვანი შვილი დარჩა.
სახალხო დამცველის ანგარიშის მიხედვით, ბოლო სამი წლის განმავლობაში, ოჯახში ძალადობის შედეგად 40 ქალია მოკლული.
შინაგან საქმეთა სამინისტროს განცხადებით, უწყება "აგრძელებს ოჯახში ძალადობის და ქალთა მიმართ ძალადობის თითოეულ ფაქტზე მკაცრი სისხლის სამართლის პოლიტიკის გატარებას. სამინისტროს მიერ ბოლო სამი თვის განმავლობაში ოჯახში ძალადობის ფაქტზე 800-ზე მეტი პირი დააკავა და 1400-ზე მეტი შემაკავებელი ორდერი გამოსცა. ოჯახში ძალადობის და ქალთა მიმართ ძალადობის წინააღმდეგ ბრძოლა შინაგან საქმეთა სამინისტროს ერთ ერთი პრიორიტეტია. ამ მიმართულებით სამინისტრო გააგრძელებს მკაცრი პოლიტიკის გატარებას ძალადობის თითოეულ ფაქტზე, თუმცა ამ პოლიტიკის ეფექტიანი აღსრულება შეუძლებელი იქნება, თუ მკაცრი პოლიტიკის გატარება არ განხორციელდება ყველა შესაბამისი სახელმწიფო უწყების მხრიდან".
