ტყიბულელი მეშახტეების საინიციატივო ჯგუფს კომპანია "საქნახშირის" მიმართ კონკრეტული მოთხოვნები აქვს:

• დროებით შეჩერდეს ტყიბულის შახტების ფუნქციონირება; კომპანიამ და სახელმწიფომ ერთობლივი ძალისხმევით შეძლონ შახტებში არსებული შრომის პირობებისა და უსაფრთხოების პრობლემების მოგვარება.

• დაიდოს კოლექტიური ხელშეკრულება დამსაქმებელსა და დასაქმებულებს შორის, რაც გაითვალისწინებს სათანადო შრომით და სოციალურ გარანტიებს დასაქმებულებისათვის;

• დაუყოვნებლივ გათავისუფლდნენ  თანამდებობიდან საწარმოში დღეს არსებულ მდგომარეობაზე პასუხიმგებელი პირები;

ამის შესახებ განცხადებას ტყიბულელი მეშახტეების საინიციატივო ჯგუფი ავრცელებს:

"შახტების ამ ფორმით ფუნქციორების ყოველი დღე, საფრხის ქვეშ გვამყოფებს. ყოველი სმენის წინ ვემშვიდობებით ჩვენს ოჯახებს რადგან არ ვიცით დავბრუნდებით თუ არა უკან.

მოვითხოვთ უსაფრთხო სამუშაო გარემოს და ელემენტარულ სამუშაო პირობებს და ამ მოთხოვნების დაკმაყოფილების გარეშე წარმოუდგენლად მიგვაჩნია შახტებში შრომის გაგრძელება",- წერია განცხადებაში.

შახტების დროებით შეჩერებას საინიციატივო ჯგუფი შემდეგით ხსნის - უნდა მოხდეს შახტებში არსებული შრომის პირობებისა და უსაფრთხოების მდგომარეობის სრულფასოვანი შეფასება, გაიწეროს საწარმოსა და სამუშაო პროცესის მოდერნიზაციის გეგმა და დაუყოვნებლივ მოვიდეს საწარმოში არსებული შრომის პირობები და უსაფრთხოების საკითხები არსებულ ეროვნულ და საერთაშორისო სტანდარტებთან შესაბამისობაში, გაწერილი გეგმის შესაბამისად. ამასთან, საწარმოს ფუნქციონირების დროებითი შეჩერების პერიოდში სრულად ანაზღაურდეს საწარმოში დასაქმებულების ხელფასი და ამაზე სრულად აიღოს პასუხისმგებლობა კომპანიამ და/ან ხელისუფლებამ;

ტყიბულელი მეშახტეების საინიციატივო ჯგუფი(ფბ გვერდი) სულ რამდენიმე დღეა რაც შეიქმნა და მათ განცხადებაში წერია, რომ ესაა დამოუკიდებელი საინიციატივო ჯგუფი, რომელიც არ წარმოადგენს არცერთ პროფესიულ კავშირს და იწყებს ბრძოლას მეშახტეების და მათი ოჯახების კეთილდღეობისათვის. 

"ქალაქი ტყიბული წლების მანძილზე უმძიმეს სოციალურ და ეკონომიკურ მდგომარეობაში იმყოფება. მაცხოვრებლების დიდი ნაწილი უკიდურესი სიღატაკის ზღვარზეა. ქალაქში დასაქმების ერთადერთ შესაძლებლობას შპს „საქნახშირის“ კუთვნილ შახტებში დასაქმება წარმოადგენს. შახტებში ჩვენი შრომითი პირობები და შრომის უსაფრთხოება უკიდურესად მძიმეა, რაც არაერთხელ გამხდარა ჩვენი მეგობრების და თანამშროლების დასახიჩრების და დაღუპვის მიზეზი. ბოლო 11 თვეში ტყიბულში 11 მეშახტე დაიღუპა, რაც შახტებში ჩვენი მძიმე სამუშაო პირობების და უსაფრთხოების ნორმების დაუცველობის შედეგია. 
ტყიბულში არსებულ უკიდურესად მძიმე მდგომარეობას ხელისუფლებისგან და კომპანიისაგან შესაბამისი პასუხიმსგებლობის აღება სჭირდება.

ჩვენ ვიწყებთ ბრძოლას ჩვენი სიცოცხლისა და შრომის უფლების დაცვისათვის.
შემოგვიერდით!", - წერია ჯგუფის განცხადებაში.