ხელისუფლებას უკვე დაწყებული აქვს კონსულტაციები, რათა მოინახოს კომპრომისული ვარიანტი და გამოიძებნოს გზები აგარის შაქრის ქარხნის ასამუშავებლად, - ამის შესახებ ბიზნესომბუდსმენის მოადგილემ, ლევან კალანდაძემ აგარის შაქრის ქარხნის თანამშრომელთა აქციის შესახებ განაცხადა.
„პრობლემის გასაღები არის ქარხნის ამუშავება. ხელისუფლებას დაწყებული აქვს კონსულტაციები და კომუნიკაცია ინვესტორთან. ბიზნესომბუდსმენის აპარატსაც ჰქონდა მათთან კომუნიკაცია. არის მზაობა კომპრომისის მისაღწევად. ჩვენ საბანკო სექტორთანაც გქონდა კომუნიკაცია. მიღებულია გადაწყვეტილება, რომ ადამიანებს, რომლებსაც დღეს ფინანსური პრობლემები აქვთ, სესხი 6 თვის ვადით გადაუვადდეთ, რათა მათზე ფინანსური წნეხი შემცირდეს”, - განაცხადა ლევან კალანდაძემ.
მან იმედი გამოთქვა, რომ ხელისუფლებასა და ინვესტორ კომპანიას შორის გონივრული შეთანხმება დროულად მიიღწევა.
„ერთი მხრივ, აქ არის სახელმწიფოებრივი და კონკრეტული ადამიანების ინტერესი, მეორე მხრივ კი -ინვესტორის. იმედს გამოვთქვამ, რომ გონივრულ შეთანხმებამდე მივალთ. კონკრეტულ ვადებსა და გადაწყვეტილებაზე დღეს ვერ ვისაუბრებთ. უნდა დაველოდოთ მოლაპარაკებებს”, - განაცხადა მან.
