დედაქალაქის მერმა, კახა კალაძემ,  თბილისის ღამის ეკონომიკის განვითარების პროექტი წარადგინა. პრეზენტაციაზე თბილისის მერთან ერთად ღამის ეკონომიკის კონცეფციასა და სამოქმედო გეგმაზე პროექტის ხელმძღვანელმა, სერგი გვარჯალაძემ ისაუბრა.   

თბილისის მერის თქმით, ღამის ეკონომიკა გულისხმობს ნებისმიერ ეკონომიკურ აქტივობას, რომელიც საღამოს 8 საათიდან იწყება და დილამდე გრძელდება. ამ პროცესში კი, მისი თქმით, ჩართულია სხვადასხვა მიმართულება, მათ შორის ტრანსპორტი და კომუნიკაციები, სარესტორნო და სასტუმრო ბიზნესი, კულტურის ინდუსტრია, ვაჭრობა და სხვა. 

მერიის ინფორმაციით, პროექტის მიზანია, ამ სექტორების კოორდინირებული მუშაობისა და მათი სტიმულირების გზით, ახალი სამუშაო ადგილების შექმნა, ტურიზმიდან შემოსული თანხის ზრდა, გარეუბნების გამოცოცხლება, საღამოსა და ღამის საათებში მრავალფეროვანი აქტივობები, თბილისის, როგორც 24-საათიანი ქალაქის პოზიციონირება საერთაშორისო დონეზე. 

როგორც პროექტის ხელმძღვანელმა აღნიშნა, თბილისის ღამის ეკონომიკის პროექტის ფარგლებში, მუნიციპალური ინიციატივების განსახორციელებლად იგეგმება ღამის ტრანსპორტის მოწესრიგება, მრავალფეროვანი კულტურული აქტივობა; მათ შორის, ღამის ღია კინოთეატრებისა და ღამის მუზეუმების ამოქმედება., გარდა ამისა, სტარტაპერებს მიეცემათ საშუალება, ბიზნესაქსელერატორებისა და შემოთავაზებული საინვესტიციო პაკეტების მეშვეობით განავითარონ ახალი ბიზნესპროექტები.

მერიის ინფორმაციით, უკვე მიმდინარეობს მოლაპარაკებები ღამის ეკონომიკის საერთაშორისო ფორუმის თბილისში გამართვასთან დაკავშირებით.