ორდღიანი ფეხით მსვლელობის შემდგომ მეშაქრეები 3 საათზე მეტია მთავრობის კანცელარიის წინ, მთავრობის წარმომადგენელთან ეხვედრას ელოდებიან. ცოტა ხნის წინ მათთვის ცნობილი გახდა, რომ მათ მთავრობის ადმინისტრაციის უფროსი შალვა თადუმაძე შეხვდება, მაგრამ, მათი თქმით, შეხვედრის ზუსტი დრო ცნობილი არაა.
მეშაქრეებმა ფეხით მსვლელობა აგარიდან 18 აპრილს, 12:00 საათზე დაიწყეს და 110 კილომეტრი დაფარეს.
აქციის მონაწილეები დღეს აცხადებდნენ, რომ მათ ჰქონდათ ინფორმაცია კომპანიის წარმომადგენლებსა და მთავრობის წევრებს შორის შეხვედრის შესახებ.
„ლიბერალი" მთავრობის პრესსამსახურს ესაუბრა, თუმცა, როგორც თავდაპირველად გვითხრეს, შეხვედრის შესახებ ინფორმაცია მათ ჯერჯერობით არ ჰქონდათ, შემდეგ კი მთავრობის ადმინისტრაციაში „ლიბერალის" ზარს არ პასუხობდნენ. ხოლო, როგორც რამდენიმე წუთის წინ გვითხრეს, თავად შეგვეხმიანებიან.
კომპანია „აგარის შაქრის“ თანამშრომლები 6-თვიანი იძულებითი მოცდენის შემდეგ ქარხნის ამუშავებას და საკითხში მთავრობის ჩართულობას მოითხოვენ. ორთვიანი, 24-საათიანი, უშედეგო საპროტესტო აქციის შემდეგ, აგარელებმა საპროტესტო აქციის მთავრობის კანცელარიასთან გაგრძელება გადაწყვიტეს.
