თბილისის 139-ე საჯარო სკოლის მოსწავლეებისადმი შესაძლო დამამცირებელი მოპყრობის ფაქტზე განათლებისა და მეცნიერების სამინისტროს შიდა აუდიტმა მოკვლევა დაიწყო. სამინისტროში ამბობენ, რომ აუდიტმა მოკვლევა მასწავლებლების განცხადების საფუძველზე დაიწყო, მოკვლევის დასრულებემდე კი დეტალებზე ვერ საუბრობენ.
საქმე ეხება გაკვეთილებზე დაგვიანებული მოსწავლეების ბიბლიოთეკაში ჩაკეტვის შემთხვევებს.
139-ე საჯარო სკოლის პედაგოგმა ნინო ხოხობაშვილმა გადაცემა „P.S.“ მიაწოდა აუდიოჩანაწერი, სადაც სავარაუდოდ სკოლის დირექტორი ნათია ფხალაძე საუბრობს და პედაგოგებს ეუბნება, რომ დაგვიანებული მოსწავლეები ბიბლიოთეკაში უნდა ჩაკეტონ გაკვეთილების დასრულებამდე და საპირფარეშოშიც არ უნდა გაუშვან. ამავეს ადასტურებს სკოლის რამდენიმე მოსწავლე „P.S.“-სთვის მიცემულ ინტერვიუში, როდესაც იხსენებენ, თუ როგორ ჩაკეტეს გაკვეთილებზე დაგვიანების გამო, დირექტორის ბრძანებით, ბიბლიოთეკაში საათების განმავლობაში, საგაკვეთილო დროის დასრულებამდე.
გასულ კვირას 139-ე საჯარო სკოლაში საპროტესტო აქცია გაიმართა. სკოლის პედაგოგები ნინო ხოხობაშვილი და ლელა მაზმიშვილი სადამრიგებლო კლასების მოსწავლეებთან ერთად, სკოლის დირექტორის გადადგომას მოითხოვდნენ.
ისინი დირექტორს, ნათია ფხალაძეს სკოლაში სასწავლო პროცესის ერთპიროვნულ მართვაში ადანაშაულებენ. მათივე თქმით, დირექტორმა სკოლის რამდენიმე პედაგოგის დისკრიმინაცია იმ ნიშნით დაიწყო, რომ მათ განსხვავებული აზრი აქვთ და დირექტორის გარკვეულ გადაცდომებს ღიად აფიქსირებენ.
ლელა მაზმიშვილის განცხადებით, სკოლაში პრობლემები მას შემდეგ დაიწყო, რაც ერთ-ერთმა მასწავლებელმა განათლების სამინისტროში ნათია ფხალაძის შესაძლო გადაცდომების შესახებ განცხადება შეიტანა, რასაც სხვა პედაგოგების განცხადებაც მოჰყვა, აუდიტის სამსახურის კვლევის შედეგად კი, დირექტორის გადაცდომები დადასტურდა.
„ლიბერალმა“ განათლებისა და მეცნიერების სამინისტროდან აუდიტის დასკვნა გამოითხოვა, რომელსაც მიღებისთანავე შემოგთავაზებთ.