მთავრობის კანონპროექტით, 2019 წლიდან ობიექტები ვალდებულნი იქნებიან, ნაღდი ანგარიშსწორებისას პროდუქცია თუ სერვისი ხუთის ჯერადი ღირებულებით გაყიდონ. შესაბამისად, ხურდად 1 და 2-თეთრიანები აღარ დააბრუნონ.

ასე რომ, თუ პროდუქტი ღირს 1.99 ლარი, მომხმარებელს მის შესაძენად სავარაუდოდ 2 ლარის გადახდა მოუწევს. ამასთან, კანონპროექტის მიხედვით, თუ ადამიანი რამდენიმე პროდუქტს ერთად შეიძენს, მათი ფასი დაჯამდება და დამრგვალებული ფასის გადახდა მოუწევს.

დამრგვალების მეთოდსა და გამოყენების წესს ეროვნული ბანკი დაადგენს. კანონპროექტი არ აზუსტებს, დამრგვალება აუცილებლად მეტობით უნდა მოხდეს თუ ნაკლებობით.

შესაბამისად, დაზუსტებული არ არის, იმ შემთხვევაში, თუ პროდუქტის ფასი 1.97 ლარია, მომხმარებელმა 1.95 ლარი უნდა გადაიხადოს თუ 2 ლარი.

უნაღდო ანარიშწორებისას ფასის ზუსტი ღირებულებით მითითება ისევ სავალდებულო იქნება, რადგან კანონპროექტი მხოლოდ ნაღდ ანგარიშსწორებას ეხება. მისი შემუშავების მიზეზიც ისაა, რომ ეროვნულ ბანკს 1 და 2-თეთრიანების წარმოება მისი მონეტების თვითღირებულებაზე მეტი უჯდება. ამ საფასურის მონეტებს კი მოსახლეობა, ფაქტობრივად, არ იყენებს.

კომიტეტის სხდომაზე დეპუტატთა ნაწილმა ინიციატივა გამოთქვა, რომ უმჯობესი იქნებოდა ყველა პროდუქტს დამრგვალებული ფასი დადებოდა, მინისტრის მოადგილე გიორგი კაკაურიძე კი ამბობს, რომ სავაჭრო ობიექტებს პროდუქტებზე ფასის დადება ჩვეულებრივად შეეძლებათ, ხოლო მომხმარებელი დამრგვალებულს ფასს სალაროსთან გადაიხდის.