ხორავას ქუჩაზე მოკლული მოზარდის, დავით სარალიძის მამა 27 მაისს პარლამენტის წინ აქციის „აღდგეს სამართლიანობა“ ჩატარებას გეგმავს. ზაზა სარალიძე მოუწოდებს ყველას, რუსთაველის გამზირზე კვირას, 19:00 საათზე მივიდეს. მისი განმარტებით, აქციის მთავარი მოთხოვნა სამართლიანობის აღდგენა იქნება. 

„მინდა მოვუწოდო საზოგადოებას, საქართველოს მოსახლეობას, არ აქვს მნიშვნელობა იქნება ეს პოლიტიკური პარტია თუ არა, მმართველი გუნდი იქნება თუ საზოგადოების ნებისმიერი წევრი, მოვუწოდებ ყველას, დამიდექით გვერდით იმ ჭეშმარიტების დადგენაში, რასაც დღესდღეობით პროკურატურა მალავს“,- განაცხადა ზაზა სარალიძემ. 

მისი განმარტებით, ის დღეს  მთავარ პროკურორთან შეხვედრასაც გეგმავს და მიღწეული შედეგით გადაწყვეტს, ჩაატაროს თუ არა აქცია. ზაზა სარალიძე ამბობს, რომ თუ დანაშაულის ჩამდენი პირები პასუხისგებაში მიეცემიან, აქცია აღარ ჩატარდება. 

„იქიდან გამომდინარე, რა პასუხებით წამოვალ მთავარი პროკურატურიდან და რა პასუხებს მივიღებ მთავარი პროკურორისგან, გადავწყვეტთ ჩატარდეს თუ არა, ან გაგრძელდეს თუ არა აქცია. თუ ჩვენი შეხვედრის დროს, ის პირები დაკავებული იქნებიან, ვინც კიდევ ჩაიდინა დანაშაული არა მხოლოდ დაჭრის ფაქტზე, არამედ თუ რაიმე წვლილი მიუძღვის ამ სასტიკ დანაშაულში, ის პირები, ვინც დაფარა დანაშაული და გაანადგურა მტკიცებულებები, ყველა პირის დაკავება თუ მოხდება, ამ შემთხვევაში ბოდიშს მოვუხდი საზოგადოებას და აქციაც აღარ ჩატარდება, რადგან სამართიანობა აღდგენილი იქნება“,- განაცხადა ზაზა სარალიძემ.

ხორავას ქუჩაზე ორი მოზარდი 2017 წლის პირველ დეკემბერს დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა. მეორე მოზარდს, დავით სარალიძეს კი რამდენიმე ოპერაცია ჩაუტარდა. თუმცა მიყენებული მრავლობითი ჭრილობების შედეგად ორ დეკემბერს გარდაიცვალა. 

შსს-მ მკვლელობის ბრალდებით ერთი პირი, 2001 წელს დაბადებული მოზარდი 2 დეკემბერს დააკავა, მეორე ბრალდებული კი პოლიციას 4 დეკემბერს ჩაბარდა. მათ ბრალად განზრახ მკვლელობა ედებათ. სასამართლომ ორივე მათგანს აღკვეთის ღონისძიების სახით პატიმრობა შეუფარდა. 

მოზარდების მკვლელობასთან დაკავშირებით პროკურატურამ პასუხისგებაში კიდევ 5 პირი მისცა. მათ ბრალად დანაშაულის შეუტყობინებლობა ედებათ. მათგან წინასწარ პატიმრობაში მხოლოდ სამი პირი იმყოფება, ორზე კი არასრულწლოვანთა მართლმსაჯულების კოდექსი გავრცელდა.