Facebook-ზე პორნოგრაფიისა და Fake Account-ების გავრცელების გამო, პაპუა-ახალი გვინეის მთავრობა აპირებს სოციალური ქსელი ქვეყანაში ერთი თვით დაბლოკოს. - ინფორმაციას ჟურნალი Time ავრცელებს.

როგორც მთავრობის წევრებმა მედიასთან განაცხადეს, ერთთვიანი „შესვენება“ მათ საშუალებას მისცემს, გამოიკვლიონ პაპუელი მომხმარებელი და მათი ქცევა Facebook-ზე.

„ამ დროის განმავლობაში ჩვენ შევაგროვებთ მონაცემებს და გამოვიკვლევთ, ვინ დგას Fake Account-ების უკან, ვინ ავრცელებს პორნოგრაფიულ ფოტოებს. ამის შემდეგ მომხმარებელი, რომელიც ცრუ ინფორმაციას ავრცელებს, ქსელიდან გაიფილტრება“, - უთხრა კომუნიკაციების მინისტრმა, სემ ბაზილმა პაპუა-ახალი გვინეის მედიას.

ბაზილმა დაამატა, რომ Facebook-ის დაბლოკვით, ქვეყანას საშუალება ექნება, დააკვირდეს სოციალური ქსელის გარეშე ცხოვრებასაც. ნახონ, უკეთესია თუ არა პაპუა Facebook-ის გარეშე. „ჩვენ შესაძლოა, ადგილობრივი დეველოპერების მეშვეობით, საკუთარი სოციალური ქსელიც კი შევქმნათ, რომელიც უფრო მორგებული იქნება პაპუა-ახალი გვინეის საზოგადოებაზე“, - დასძენს ბაზილი.

როგორც Time წერს, Facebook-ის წარმომადგენლებს The Washington Post დაუკავშირდა. კომპანიის განცხადებით, ისინი ეცდებიან პაპუა-ახალი გვინეის მთავრობასთან ერთობლივად იმუშაონ და გაარკვიონ, რა გახდა მათი შეშფოთების მიზეზი.