საქართველოსა და ჰონგ კონგს შორის მიმდინარე თვის ბოლოს თავისუფალი ვაჭრობის შეთანხმებას მოეწერება ხელი - ამის შესახებ საქართველოს პრემიერ-მინისტრმა, გიორგი კვირიკაშვილმა მთავრობის დღევანდელ სხდომაზე განაცხადა.
პრემიერ-მინისტრის თქმით, თავისუფალი ვაჭრობის ხელშეკრულებებს ევროკავშირთან, ჩინეთთან (რომელიც უახლოეს წარსულში ამოქმედდა), ევროპის თავისუფალი ვაჭრობის ასოციაციასთან (EFTA), თურქეთსა და დსთ-ს ქვეყნებთან უახლოეს ხანში ჰონგ კონგიც შეემატება. აღნიშნულთან დაკავშირებით ხელშეკრულება „Belt and Road”-ის სამიტის ფარგლებში გაფორმდება.
„ეს ძალიან მნიშვნელოვანია ჩვენი პროდუქციის ექსპორტისთვის და, რა თქმა უნდა, კიდევ ერთხელ წარმოაჩენს საქართველოს ღია ეკონომიკას, ღიას ვაჭრობისთვის, ინვესტიციებისთვის. დარწმუნებული ვარ, ეს დამატებით ბიძგს მისცემს ჩვენი ქვეყნის ეკონომიკურ განვითარებას,“ - აღნიშნა მთავრობის მეთაურმა.