საქართველოს პრეზიდენტმა გიორგი მარგველაშვილმა ტყიბულში დაღუპული მეშახტე სანდრო ბუცხრიკიძე ქველმოქმედებისთვის წმინდა ნიკოლოზის ორდენით დააჯილდოვა. ინფორმაციას პრეზიდენტის პრესსამსახური ავრცელებს.
გიორგი მარგველაშვილმა დაღუპული მეშახტის ოჯახს სამძიმარი გამოუცხადა და სახელმწიფო ჯილდო სანდრო ბუცხრიკიძის მშობლებს გადასცა.
„მოვედი, რომ მოგისამძიმროთ და გავიზიარო თქვენი ტკივილი და მინდა, სიამაყეც გავიზიარო თქვენთან ერთად, რომ ჩვენს სამშობლოს ასეთი შვილი გაუზარდეთ.
მადლობა მინდა გითხრათ ამისათვის და წმინდა ნიკოლოზის ორდენი გადმოგცეთ, ეს არის სპეციალურად ქველმოქმედი ადამიანებისთვის დაარსებული ორდენი. ადამიანი, რომელსაც არ ჰქონდა მილიონები, მაგრამ იყო ქველმოქმედი. ღმერთმა ქნას, რომ ბევრი ასეთი შვილი ჰყავდეს ჩვენს ქვეყანას“, - უთხრა გიორგი მარგველაშვილმა სანდრო ბუცხრიკიძის ოჯახის წევრებს.
სანდრო ბუცხრიკიძე ტყიბულში კიდევ ერთ მეშახტესთან ერთად 2 ივნისს დაიღუპა. ის მეშახტეობის პარალელურად ტყიბულის თეატრის მსახიობი იყო და მუშაობდა წითელი ჯვრის ადგილობრივ ორგანიზაციაში.
