საპარლამენტო უმრავლესობის წევრი დავით ჭიჭინაძე ამბობს, რომ გიორგი კვირიკაშვილის ეკონომიკური პოლიტიკის მთავარი ხარვეზი ბანკებთან მეტისმეტად ლოიალური დამოკიდებულება იყო.
როგორც დავით ჭიჭინაძემ უმრავლესობის სხდომის დაწყებამდე განაცხადა, ის ფინანსთა მინისტრის მამუკა ბახტაძის ხედვას იზიარებს.
დღეს „ქართული ოცნების“ ოფისში მმართველი პარტია პრემიერ-მინისტრობის კანდიდატზე მსჯელობს. შეხვედრა ცოტა ხნის წინ დაიწყო.
„ზოგადად, ის განცხადებები, რასაც მამუკა ბახტაძე გამოთქვამდა ბანკებთან მიმართებაში, აბსოლუტურ თანხვედრაშია ჩემს პოზიციასთან. მე ვფიქრობ, ეს იქნება ძალიან კარგი მიმართულება, თუ პრემიერ-მინისტრის რანგში გააგრძელებს იმავე პოლიტიკას, რასაც აფიქსირებდა ფინანსთა მინისტრობის დროს.
მე პირველივე დღიდან, საარჩევნო კამპანიიდან მოყოლებული, ყოველთვის ვაფიქსირებდი, რომ ბანკები ხელს უშლიან ქვეყნის ეკონომიკურ განვითარებას. იგივე დააფიქსირა ბახტაძემ. თუ გვინდა, დავძლიოთ ეკონომიკური პრობლემები, უნდა შევზღუდოთ ბანკები. არ შეიძლება ქვეყანაში ერთი სტრუქტურა მდიდრდებოდეს წელიწადში მილიარდით და დანარჩენი მოსახლეობა სამ-სამი და ოთხ-ოთხი მილიარდით ვალს იღებდეს“, - განაცხადა დავით ჭიჭინაძემ.
