საპარლამენტო უმრავლესობის ლიდერი არჩილ თალაკვაძე ამბობს, რომ დღევანდელ შეხვედრაზე მინისტრობის კანდიდატებზე მსჯელობა არ ყოფილა.
როგორც არჩილ თალაკვაძემ ჟურნალისტებთან თქვა, კანდიდატების შესახებ მსჯელობა გაგრძელდება პრემიერ-მინისტრობის კანდიდატთან, მამუკა ბახტაძესთან ერთად და შემადგენლობა უახლოეს ხანში გახდება ცნობილი.
ცოტა ხნის წინ მართველმა პარტიამ პრემიერ-მინისტრობის კანდიდატად ფინანსთა ყოფილი მინისტრი მამუკა ბახტაძე დაასახელა. „ქართული ოცნების“ ოფისში დღეს გაერთიანებული სხდომა გაიმართა, რომელზეც პრემიერობის კანდიდატზე მსჯელობდნენ.
მამუკა ბახტაძე ფინანსთა მინისტრი 2018 წლის 13 ნოემბერს გახდა. მანამდე ის სს „საქართველოს რკინიგზის“ გენერალური დირექტორი იყო.
მამუკა ბახტაძე 36 წლისაა. დაამთავრა თბილისის სახელმწიფო უნივერსიტეტი და საქართველოს ტექნიკური უნივერსიტეტი. ფლობს ლომონოსოვის სახელობის მოსკოვის სახელმწიფო უნივერსიტეტის მაგისტრის ხარისხს. 2010 წელს INSEAD-ის ბიზნესსკოლაში მიენიჭა MBA-ის კვალიფიკაცია.
