ამ წუთებში საპატრიარქოში სინოდის სხდომა მიმდინარეობს. სხდომაზე განსახილველი საკითხები საჯარო არ არის და მხოლოდ მღვდელმთავრებისთვისაა ცნობილი. რა საკითხებზე იმსჯელებენ დღეს სინოდის სხდომაზე, ამის შესახებ საპატრიარქოში შესვლამდე კომენტარი მღვდელმთავრების ნაწილმა გააკეთა.
ვანისა და ბაღდათის მიტროპოლიტი ანტონი არ გამორიცხავს, რომ სინოდის დღევანდელ სხდომაზე უკრაინის ავტოკეფალიის საკითხთან დაკავშირებით იმსჯელონ. მისი თქმით, უკრაინის დღეს, სავარაუდოდ, ავტოკეფალიის საკითხს განიხილავენ.
უკრაინის მართლმადიდებელი ეკლესია რუსეთისგან გამოყოფას, ავტოკეფალიას მოითხოვს. ამისთვის უკრაინელებმა მსოფლიო საპატრიარქოსაც მიმართეს. ავტოკეფალიის მოთხოვნით უკრაინის პრეზიდენტმა წერილი მსოფლიო პატრიარქთან 17 აპრილს გაგზავნა.
ამ თემაზე საქართველოს საპატრიარქოს ივნისში ეწვია რუსეთის ეკლესიის საგარეო ურთიერთობათა განყოფილების თავმჯდომარე, მიტროპოლიტი ილარიონ ალფეევი, შემდეგ კი მსოფლიო საპატრიარქოს დელეგაციის წევრებიც.
სინოდის სხდომაზე შესვლამდე მღვდელმთავრები არ ადასტურებდნენ, განიხილება თუ არა სხდომაზე მიტროპოლიტ შიოს მესაყდრეობის საკითხი, თუმცა ჭყონდიდელი მიტროპოლიტის, პეტრეს თქმით, ის ამ თემაზე პატრიარქის განმარტებას ელის. „მე ველოდები, რომ უწმინდესი მოგვცემს განმარტებებს თავის გადაწყვეტილებასთან დაკავშირებით“, - უთხრა მიტროპოლიტმა ჟურნალისტებს სინოდის სხდომის დაწყებამდე.
თუმცა, როგორც პატრიარქის მდივანმა მიქაელ ბოტკოველმა „ინტერპრესნიუსს“ უთხრა, მეუფე შიოს თანამოსაყდრეობიდან გადაყენების საკითხი სინოდის სხდომაზე არ განიხილება.