NBA-ს ორგზის ჩემპიონი ზაზა ფაჩულია კარიერას, სავარაუდოდ, „დეტროიტ პისტონსში“ გააგრძელებს. წყაროებზე დაყრდნობით Yahoo Sports წერს, რომ ფაჩულიამ გუნდთან ერთწლიანი კონტრაქტი გააფორმა და წელიწადში 2.4 მილიონ ამერიკულ დოლარს მიიღებს.
ზაზა ფაჩულიამ ბოლო ორი სეზონი „გოლდენ სტეიტ უორიორზში“ გაატარა, სადაც NBA-ს ორგზის ჩემპიონი გახდა. ქართველმა ცენტრმა 139 თამაშიდან 127 ძირითად შემადგენლობაში დაიწყო და საშუალოდ ერთ შეხვედრაში 5.7 ქულას და 5.3 მოხსნას აგროვებდა.
ზაზა პირველი ქართველი კალათბურთელია, ვინც ეს ტიტული მოიგო, მან NBA-ს „ბეჭედი“ საქართველოშიც ჩამოიტანა. საქართველოს პრეზიდენტმა გიორგი მარგველაშვილმა საქართველოში კალათბურთის განვითარებაში შეტანილი წვლილისთვის ფაჩულია ღირსების ორდენითაც დააჯილდოვა.
