CNN ტაილანდში, თამ ლუანგის მღვიმიდან გამოყვანილი ბავშვების პირველ ვიდეოკადრებს ავრცელებს. სიუჟეტში ჩანს საავადმყოფოს პალატა, სადაც არიან მოზარდები.

ტაილანდის ხელისუფლების განცხადებით, ბავშვების ჯანმრთელობის მდგომარეობა დამაკმაყოფილებელია და მათ საფრთხე არ ემუქრებათ.

ტაილანდში, თამ ლუანგის მღვიმეში 12-მა ბავშვმა და მათმა მწვრთნელმა 2 კვირაზე მეტი გაატარეს. ისინი მღვიმის დასათვალიერებლად 23 ივნისს შევიდნენ, მაგრამ ძლიერმა წვიმამ გამოსასვლელი ჩაკეტა და მოზარდები გამოქვაბულში გამომწყვდეული ჩარჩნენ.

მოზარდების გამოყვანა მხოლოდ 17 დღის შემდეგ მოხერხდა. უშუალოდ გამოყვანის ოპერაცია სამ დღეს გაგრძელდა, რადგან მღვიმიდან მოზარდების დახსნა ბევრ სირთულესთან იყო დაკავშირებული.

ბავშვების ასაკი 11-დან 16 წლამდეა, მწვრთნელი კი 25 წლისაა. ისინი ბრიტანელმა მყვინთავებმა მღვიმეში, 4 კილომეტრის სიღრმეში 10-დღიანი ძებნის შემდეგ იპოვეს. 

პოვნის შემდეგ, გამოყვანამდე მოზარდებს ჟანგბადის ბალონები, საკვები და მედიკამენტები მიაწოდეს. მღვიმეში დაიღუპა ერთ-ერთი მაშველი, რომელიც საზღვაო ფლოტის ყოფილი წევრი იყო.