„მხარს დაუჭერდით თუ არა იმ კომპანიებს, რომლებსაც შრომის უსაფრთხოების კუთხით შედარებით უმწიკვლო ისტორია აქვთ?“ - ამ კითხვით უმრავლესობის დეპუტატმა, აკაკი ზოიძემ ინფრასტრუქტურის მინისტრობის კანდიდატს, მაია ცქიტიშვილს მიმართა.
ზოიძე დაინტერესდა, როგორია მისი პოზიცია ბიზნესის ზედმეტი რეგულაციებით დახრჩობასა და შრომის უსაფრთხოებას შორის ბალანსზე.
„ჩემი აზრით, ეს არის ერთ-ერთი საშუალება, საბაზრო გზით ხელი შევუწყოთ შრომის უსაფრთხოების ნორმების რეალურ გატარებას; რომ სახელმწიფო შესყიდვა წავიდეს იმ კომპანიებში, რომლებისთვისაც მნიშვნელოვანია თანამშრომლების სიცოცხლე და ჯანმრთელობა. მერე პარლამენტის გადასაწყვეტია, რა ცვლილებებს შევიტანთ კანონმდებლობაში, მაგრამ თქვენი პოზიცია მაინტერესებს“, - მიმართა დეპუტატმა ცქიტიშვილის.
მინისტრობის კანდიდატის განმარტებით, მათ კომპანიების შერჩევისას წინასაკვალიფიკაციო მოთხოვნები აქვთ და როცა კომპანიას აფასებენ, ეს არის ერთ-ერთი ფაქტორი.
„თუმცა ვერ ვიტყოდი, რომ მხოლოდ სტატისტიკას უნდა მივაქციოთ ყურადღება. იმიტომ, რომ უბედური შემთხვევებიც ხდება. შეიძლება უსაფრთხოების წესები დაცული იყოს, მაგრამ უბედური შემთხვევა მაინც მოხდეს. ამის გამო კარგი კომპანია არ უნდა დავსაჯოთ. თუმცა, რა თქმა უნდა, პრიორიტეტს მივანიჭებთ იმ კომპანიებს, რომლებიც ზრუავენ შრომითი უსაფრთხოების დაცვაზე“, - უპასუხა მაია ცქიტიშვილმა პარლამენტში, სადაც დღეს დეპუტატები სხვადასხვა ფორმატში მინისტრობის კანდიდატებს უსმენენ.