რაც შეეხება ქალბატონ წულუკიანს, მარტივად ვიტყვი, რომ ვარ იმავე პოზიციაზე. ვიზიარებ არასამთავრობო სექტორისა და საზოგადოების დიდი ნაწილის შეშფოთებას - ამის შესახებ პრეზიდენტმა, გიორგი მარგველაშვილმა ჟურნალისტებს განუცხადა.
მისი თქმით, სასამართლო ხელისუფლება ქვეყნის დემოკრატიულ განვითარებაში არააქტიურად არის ჩართული და ამ მხრივ იუსტიციის მინისტრის წვლილი გასააზრებელია.
„მე ფაქტად ვხედავ იმას, რომ საქართველოში სასამართლო ხელისუფლება ჩვენი ქვეყნის დემოკრატიულ განვითარებაში ერთ-ერთი არააქტიურად ჩართული ნაწილია და ბუნებრივია, აქ იუსტიციის მინისტრის წვლილი გასააზრებელია. მე მიმაჩნია, რომ იმ სერიოზული უკმაყოფილების ტალღა, რომელიც სულ ერთი თვის წინ იყო რუსთაველზე, ის ტრაგიკული ისტორიები, რომლებსაც ვისმენდით და ეს არ იყო მარტო სარალიძის საქმე, ეს იყო ათობით შემაძრწუნებელი საქმე, გასაზიარებელია. არ უნდა სჭირდებოდეს დაზარალებულს ღამეების თენება პროკურატურასთან ან შინაგან საქმეთა სამინისტროსთან იმისთვის, რომ მიაღწიოს თავის სამართალს. აქედან გამომდინარე, მე ვიზიარებ იმ პოზიციას, რომელიც აქვს საზოგადოებას და იმ სულისკვეთებას, რომ ამ მიმართულებით ბევრად რადიკალური ნაბიჯებია გადასადგმელი“, - განაცხადა გიორგი მარგველაშვილმა.