დამწვრობის ცენტრის ხელმძღვანელმა, გუგა ქაშიბაძემ განაცხადა, რომ ტყიბულის შახტში დაშავებული 4 ადამიანი თბილისის დამწვრობის ცენტრშია გადმოყვანილი და ორი მათგანი რეანიმაციულ განყოფილებაში იმყოფება.
„ორი მათგანი დამწვრობის ცენტრის რეანიმაციულ განყოფილებაშია მოთავსებული. მათ აღენიშნებათ სხეულის 25 და 50%-იანი დამწვრობა, დამწვრობითი შოკი, სასუნთქი გზების თერმულ-ინჰალაციური დაზიანება. ამ დროისთვის მათი მდგომარეობა სტაბილურია, თუმცა დიაგნოზი - სერიოზული. ორი პაციენტი კი მოთავსებულია გადაუდებელი დახმარების განყოფილებაში. ახლა მათ უტარდებათ გამოკვლევები. აღინიშნება სასუნთქი გზების თერმულ-ინჰალაციური დაზიანება, ფილტვების კონტუზია, დაჟეჟილობა. გამოკვლევების შემდეგ გადაწყდება, თუ რომელ განყოფილებაში მოთავსდებიან", - განაცხადა ქაშიბაძემ.
დღეს ტყიბულში, მინდელის სახელობის შახტში 4 მეშახტე დაიღუპა, 6 კი დაშავდა.
შსს-ს ინფორმაციით, გამოძიება სისხლის სამართლის კოდექსის 240-ე მუხლის მეორე ნაწილით მიმდინარეობს - სამთო, სამშენებლო ან სხვა სამუშაოს წარმოებისას უსაფრთხოების წესების დარღვევა, რამაც ადამიანის სიცოცხლის მოსპობა გამოიწვია.
მინისტრის მოადგილე: შახტის გაჩერების შემდეგ ხელფასს კომპანია აანაზღაურებს
„მითხრეს, თანხას მოვიტანთო - ასე ყიდულობენ სიცოცხლეს?!“ - ტყიბულში დაღუპული მეშახტის შვილი